Xanana: tenke kuda metin asaun tulun-malu

DILI (TOP) — Ema riku nain balun moris iha ema ki’ak rabat rai lubun boot nia le’et. Kareta luxu halai liu husi uma a’at sira. Injustisa sosial entre ema riku-nain ho ema ki’ak rabat-rai sai nu’udar visaun komun lorloron.

La iha solidariedade, humanu lakon humanidade. Ida ne’e hotu nu’udar sintomas husi lakon solidariedade. Ema buka di’ak no riku soin mes-mesak de’it. Laiha hanoin ida ba sira ne’ebé presija tebes tulun iha tempu difisil. Krize solidaridade nu’udar sinal ba sosiedade ida atu nakfera fahe ba rua ona, no nakfera rahun ba rahun.

Laureadu nobel ba paz, José Ramos Horta ho nia kareta ki'ik ne'e la'o haleu estrada iha lagoa Tasi-Tolu, Komoro, Dili iha loron Sábadu 05 Juñu 2021.

Komunidade Tasi-Tolu ne’ebé sai terus nain ba inundasaun durante ne’e ladun hetan atensaun maka’as husi ema riku-nain sira, liliu husi parte governu. Iha grupu emprezariu balun de’it maka hamrik hamutuk ho eis Primeiru-Ministru, Kay Rala Xanana Gusmão nia kotuk hodi tulun komunidade sira ne’e.

Maioria komunidade sira oras ne’e asesu ona estrada, no barak mós maka fila hela ona iha sira nia fatin maske simples tebes.

Ohin loron sira be inisiu lakohi fó tulun ba komunidade sira ne’e, sira maka lorloron ba faan sira nia produtu iha área ne’e hodi buka lukru ekonomia ba sira nia aan, maibé bainhira komunidade sira husu tulun sira nia ajuda, sira taka metin liman, taka metin matan, taka metin tilun hodi nonok de’it, no lakohi hare susar saida maka komunidade sira hasoru hafoin inundasaun iha loron 04 Abril liuba.

Maske nune’e, lider karismátiku Kay Rala Xanana Gusmão husu ba komunidade sira iha aldeia 12 de Outubro kompostu husi bairu 12 atu hatudu hahalok tulun malu nafatin, komprende ba malu no hametin unidade nasionál.

“Ha’u nia mensajen maka ida ne’e ka’er metin solidaridade, unidade, no kompriende malu iha problema ruma karik tur hamutuk ho katuas sira hodi hatudu klima kompriende malu, klima seguransa hodi nune’e aldeia ida ne’e bele la’o ba oin iha futuru,” Xanana apela ba komunidade Tasi-Tolu liu iha seremonia enseramentu kultural iha Tasi-Tolu, Komoro, Dili Sábadu 05 Juñu 2021.

“Tanba ha’u fiar katak iha aldeia  12 Outubru kompostu husi bairu 12 ne’e problema ne’ebé maka mosu iha imi nia le’et, imi tur hamutuk rezolve lalika baku-malu, lalika estraga malu, ho esperansa boot tanba se imi fiar ha’u, ha’u tenke fiar imi, ha’u fó hakoak ba imi ho domin tomak,” Xanana hateten.

Xanana dehan, hahu kedas iha bairu Besi-Mean, to’o remata hotu-hotu hateten katak, prezente husi komunidade laiha buat ida atu selu karik atu selu hein governu halo projeitu ne’ebé sei selu loos ka la’e, ne’ebé ohin hahu husi Besi Mean to’o bairu João Paulo II hotu-hotu heteten laiha buat ida.

“Se imi hadomi ha’u, se imi hadomi malu, se imi hadomi rai ne’e, se imi hadomi ita nia nasaun, imi nia agradesimentu ne’ebé sei murak tebes maka imi hakarak hatene ka la’e komunidade sira hatan katak hakarak lider karismatiku husu tan imi  atu halo tuir ka la’e, Imi nia agradesimentu ba rai ida ne’e nasaun ida ne’e, ba imi rasik, ha’u dook mós ha’u bele simu kontente karik imi iha aldeia 12 de Outubro, bairu 12 joven sira imi la baku malu la estraga malu ida ne’e maka imi nia agradesimentu boot ba ha’u”.

Marcelino Bata
Author: Marcelino BataWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP. Bandu atu simu envelope ka sasan ruma husi fonte informasaun sira.

PUBLISIDADE

Online Counter