DILI (TOP) — Komisaun Funsaun Públiku (KFP) mós akompaña ona saida maka akontese iha Agência Notisioza Timor-Leste, TATOLI, Institutu Públiku (TATOLI, I.P), tanba ne’e planeia ona atu halo buska konjuntu ida ba instituisaun públiku, la’os ba instituisaun unipesoal, Lda.
Notisia relevante: Deskonfia TATOLI “hakiak no haburas” nepotizmu
Hafoin The Oe-Kusi Post (TOP) to’o iha komisariu KFP ne’e nia serbisu fatin, komisariu ne’e direitamente husu ba nia asesor juridiku hodi imprime sai lala’ok legal sira kona-ba prosesu rekrutamentu funsionáriu públiku iha instituisaun públiku sira inklui TATOLI, I.P.
Molok entrega dokumentu lei, asesor juridiku ne’e esplika ba Komisariu KFP ne’e katak, prosesu hotu tenke liu husi konkursu públiku, la’os bolu malu de’it. Konkursu públiku ne’e iha parte rua de’it. Parte ida KFP rasik maka loke konkursu públiku hodi rekruta funsionáriu públiku ida, no parte seluk Instituisaun Públiku mós lei fó dalan hodi halo rekrutamentu rasik. Maibé ida ne’e depende ba Instituisaun Públiku ida-idak ninia estatutu ne’e permite ka la’e.
Estatutu TATOLI, I.P ne’ebé hatur iha dekretu Lei No 21/2017 de 24 de Maiu iha Artigu 13.º Competências do Conselho Diretivo iha alínea J) Promove o recrutamento e gerir o pessoal, nos termos da Lei; k) Praticar os demais atos determinados por Lei. Maibé, realidade viola artigu sira ne’e). Estatutu TATOLI, I.P nian ne’e esplika klaru katak, se de’it maka atu ba serbisu iha instituisaun públiku ne’e tenke liu husi konkursu públiku, la’os bolu malu de’it maka ba.
“Ha’u sei haruka ha’u nia ema ida halo hodi tun konjuntu,” esplika Komisariu KFP ida bainhira dadalia ho jornalista The Oe-Kusi Post (TOP) iha nia serbisu fatin iha Vila-Verde, Dili, Kinta 11 Novembru 2021.
Komisariu ne’e katak, nia presija levantamentu ida ne’ebé dirije ba Inspesaun Jeral Estadu (IJE), KFP, no PDHJ hodi tun hamutuk atu halo inspesaun ba TATOLI, I.P iha tempu badak.
La’os de’it deskonfia mosu prátika “hakiak no haburas” nepotizmu, maibé deskonfia mós mosu prosesu naksalak balun iha kontratu fornesimentu internet entre TATOLI, I.P ho empreza TELKOMCEL, basa tuir dadus balun ne’ebé TOP asesu, kada fulan TATOLI, I.P selu osan hamutuk $3000 ba TELKOMCEL, infelizmente funsionariu TATOLI lubuk ida inklui jornalista sira deklara nunka uja internet iha sira nia serbisu lorloron besik tinan ida ona.
Kona-ba kestaun ne’e, tuir Pontu Fokál Komisaun Anti Korupsaun (KAK), Euclides Madeira hateten, posisaun KAK nian sei la nonok ba kontratu ne’ebé maka Tatoli, I.P halo ho TELKOMCEL kona-ba fornesimentu rede internet ba instituisaun públiku ne’e.
“Ita sei la tuur nonok maibé, ita sei akompaña. Ita mós sei halo serbisu para rekolla informasaun sira ne’e, kona-ba dukumentu ruma ne’ebé maka karik eziste. Ita bele foti husi entidade sira husi TATOLI, I.P no Rede internet Telemunikasaun TELKOMCEL,” hateten Euclides Madeira ba The Oe-Kusi Post (TOP) hafoin partisipa konferensia ba imprensa ida iha edifisiu KFP iha Vila-Verde Dili, Kinta, 11 Novembru 2021.
Pontu fokál ne’e hatutan, KAK sei konsentra buka informasaun inisial kona-ba kontratu fornesimentu rede internet husi kompañia operador telekomunikasaun TELKOMCEL ba TATOLI, I.P, no rede internet ne’e uja duni ka la’e.
Nia hatutan, informasaun kona-ba prosesu balun iha TATOLI, I.P ne’ebé lekar sai ona ba públiku, automatikamente KAK sei fó atensaun makaas ba asuntu ne’e.
Jornalista Marcelino Bata mós kontribui ba reportajen ne’e.
