MS “Falla” Transmite Informasaun CorVid-19 ho Kredibel

Prezidente TLPU, Manuel Pinto (Liman Loos) ho Prezidente AJTL (Liman Karuk) hala'o konferensia ba imprensa hodi husu ba Ministériu Saúde tenke transmite informasaun ho loloos no kredibel kona-bá propagasaun pandemia Coronavirus Disease 2019 (CorVid-19), Farol-Dili, Kinta 26 Marsu 2020. Foto Supply.

Oekusipost.com – Foin mak ema estranjeiru ida positivu infetadu moras Coronavirus Disease 2019 (CorVid-19) iha Timor-Leste, maibé lori ona impaktu barak hodi halo sisedade tomak iha rai-laran sente pániku, no tur la hakmatek, tanba kauza ida husi governu liu husi Ministériu Saúde “falla” hodi transimite informasaun ne’e ho adekuadu no kredibel ba públiku.

Nune’e, asosiasaun jornalista sira iha rai laran hanesan Timor-Leste Press Union (TLPU) no Asosiasaun Jornalista Timor-Leste (AJTL) kondena maka’as komisaun CorVid-19 ne’ebé lidera direitamente husi MS, tanba durante loron hirak nia laran ladun fornese informasaun ne’ebé adekuadu ba jornalista sira, nune’e ikus mai hamosu dezintendimentu.

Liga ba kestaun ne’e, TLPU ho AJTL fornese solusaun ida ba MS presija estabelese tiha sentru media (Media Centre) hodi bele fasilita jornalista sira asesu ba informasaun ne’ebé klean no loos hodi nune’e labele fó espasu ba informasaun falsu sira domina iha rai-laran kona-bá CorVid-19.

“Ami hakarak husu ba Governu liliu Ministériu Saúde ka komisaun COVID-19 katak atu kria sentru mídia ba COVID-19, atu nune’e bele fornese informasaun loloos no klean ba mídia iha periódu propagasaun COVID-19 nian,” sujere Prezidente TLPU atual Vise-Prezidente Ajensia Notisioza TATOLI, Manuel Pinto liu husi konferensia ba imprensa iha Farol-Dili, Kinta 26 Marsu 2020.

Uatucarbau oan ne’e mós husu tratamentu ida hanesan, no justu husi MS ba jornalista hotu tantu husi media privadu no públiku bainhira halo konferensia imprensa ruma kona-bá CorVid-19.

“Públiku ezize media atu toma nia papél nu’udar ajente informasaun atu hakonu públiku nia direitu asesu ba informasaun, maibé iha periódu propagasaun CorVid-19, jornalista sira hasoru barreira oin-oin atu hetan informasaun ida ne’ebé loos no kredível, liliu atu hetan informasaun ofisiál husi komisaun CorVid-19 ne’ebé lidera husi MS no Organizasaun Mundiál Saúde (OMS),” eis jornalista STL ne’e komenta.

Faktu hatudu, konferensia imprensa ne’ebé durante ne’e hala’o husi MS no OMS kona-bá CorVId-19 la fó espasu jornalista sira hodi husu pergunta kona-bá progresu propagasaun CorVid-19 iha rai-laran.

Eis Koordenador Kobertura (Koordinator Liputan) Jornal Timor Post ne’e katak, AJTL ho TLPU husu mós ba media sira hotu atu hala’o serbisu ho sériu no prepara ekipamentu protesaun ba jornalista sira, bainhira halo kobertura iha espasu públiku, hodi nune’e labele fó risku ba jornalista sira.

Asosiasaun jornalista rua ne’e mós durante ne’e konsege identifika mosu informasaun falsu barak sirkula iha plataforma media sosial hanesan iha Facebook (Messenger) no WhatsApp kona-bá progresu moras CorVid-19 iha Timor-Leste, nune’e husu ba jornalista sira tenke halo verifikasaun didi’ak molok públika notisia ruma kona-bá assuntu ne’e.

Dadus Ministériu Saúde kona-bá CorVid-19 ne’ebé fó sai iha loron 25 Marsu 2020 rejista ema hamutuk nain 11 mak sai suspeitu, nain 10 ikus mai negativu, no nain ida mak positivu.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE