Oekusipost.com Dili - Governu liu husi Ministeriu Saude iha medida haat (4) ne'ebe mak bele prevene moras virus korona bainhira ataka sidadaun ruma iha Timor-Leste.
Ministra Saude interina, Elia A.A dos Reis Amaral hatete, ba iha saude nian hare ba iha mekanismu implementasaun ne'e sai ameasa ba iha saude publika. Tanba ne'e, presiza organizadu ba iha parte kestaun sira ne'ebe mak oinsa hare liu ba iha regra internasional ne'ebe sai ba regulamentu nian.
"Iha saúde públiku nian ita halo avaliasaun ba risku, vijilansia epidemilojika, komunikasaun risku, prevensaun no kontrolu," hatete Ministra Saude interina, Elia A.A dos Reis Amaral hafoin partisipa iha debate estadu emerjensia iha Parlamentu Nasionál, Kinta 26 Marsu 2020.
"Saida mak avalisaun risku, ita presiza hatene katak se iha risku ida ita hare ba kazu, no kazu ne'e mai husi ne'ebé, loos ka la'e," hatete nia.
Nia dehan, bainhira kazu ne'e mak importadu ka ema mak lori tama mai depois mak transmite ba sidadaun sira, no kazu ne'e orijin Timor-Leste nian, ne'e mak avaliasaun ba risku nian. Maibé kona-bá vijilansia epidemilojika ne'e presiza hare ba tranzmisaun nian liuliu ba kada lokal komunidade ne'e presiza halo observasaun hafoin mak governu halo buat ruma iha fatin ne'e.
Governante ne'e hatutan, ba iha komunikasaun risku ne'e kompostu husi laboratoriu no ekipa sira ne'ebe mak karik iha suspeitu ba iha kazu pozitivu nian maibé espera katak labele iha, ne'e mak hare liu ba iha situasaun komunikasaun nian. Nune'e mós, nia esplika, prevensaun no kontrolu ne'e hare liu ba iha diagnostiku laboratóriu.
"Diagnostiku laboratoriu ne'e ita tenke agradese ba iha governu Australia servisu hamutuk ho Ministeriu Saude ne'ebe estabelese ona laboratoriu nasional," haktuir nia.
Nia hatete, durante ne'e teste ne'ebe mak governu halo ne'e ba iha Australia, maibe iha semana ida ne'e nia laran halo teste deit iha Timor Leste maibe ho konteudu ne'ebe minimu.
"Ha'u hanoin ita hotu hatene, ami halo ona lansamentu ba iha estensaun fatin laboratoriu ne'e atu hare ba kuantidade sei iha semana 3 ba oin karik iha kazu mil ital ba leten ne'e ita bele deteta iha Timor Leste," hatete Elia.
Tanba ne'e, Elia apela ba komunidade sira katak labele preokupa tanba Ministeriu Saude servisu hamutuk ho governu Australia, komunika ona ho aviaun Airnot atu bele hare amostra sira tama no sai.
