DILI (TOP) – Ministra Saúde Odete Maria Freitas Soares halo ona vizita ba Sentru Integradu ba Jestaun Krize (SIJK) iha Sentru Konvensaun Dili hodi hare besik liutan serbisu sira durante ne’e.
“Ita iha Sentru Integradu Jestaun Krize ne’ebé mak toma konta hela ba moras Covid-19 ne’e. Ita nia prezensa mai ne’e, liu-liu ministériu saúde nia prezensa iha fatin ida ne’e, ami loloos halo planu atu mai vizita iha fatin ida ne’e, felizmente husi komisaun sentru ida ne’e halo komvite ba iha ministériu saúde no ami apresia tebes ba komvite ida ne’e bele marka prezensa ohin,” hatete Ministra Odete ba jornalista sira iha Sentru Kovensaun Dili, Kinta 04 Juñu 2020.
“Ha’u mai la’os atu hato’o buat ruma, ha’u hakarak atu koñese ema sira ne’ebé mak servisu iha sentru integradu ida ne’e, ohin bainhira ha’u rona sira nia aprezentasaun komprensivu tebes mai ha’u atu koñese malu liutan ho ema ne’ebé mak servisu iha sentru ne’e.”
Nia hatutan, ekipa sira ne’e mós la’os aprezenta de’it, maibé sira mós avalia servisu ba iha pilar 8 ne’ebé mak iha MS nia okos.
“Tuir ami saúde haree katak ho strutura ministériu saúde ne’ebé mak seidauk kompletu iha tempu ne’ebá ita seidauk iha ministru, ita iha vise ida de’it, entaun iha buat barak ne’ebé mak difikulta iha ita nia implementasaun. Ha’u nia prezensa iha ne’e, ami sei hein ami nia vise ida ne’ebé mak sei mai ha’u, no sei halo buat ruma.”
