Oekusipost.com Dili – Timoroan hamutuk nain 5 mak oras ne’e positivu kona moras virus corona (COVID-19) iha Timor-Leste.
Portavóz Sala Integradu ba Jestaun Krize, dotor Rui Maria de Araújo hatete, ema ne’ebé oras ne’e iha kuarentena hamutuk nain 570, ema hamutuk nain 178 mak deskonfia (iha sintomas), ida ne’e númeru kumulativu desde loron 6 Marsu to’o 14 Abril 2020.
“Iha nain 6 mak konfirmadu, husi nain 6 konfirmadu ne’e, ida kuradu tiha ona, no nain 5 mak oras ne’e iha sentru izolamentu iha Vera Cruz nian. Ne’e signifika katak durante oras 24 nia laran ne’e iha tan ema nain 2 mak rezultadu analize hatudu konfirmadu COVID-19, sira restu ne’e negativu,” hatete dotor Rui liu husi konferensia ba imprensa iha Sentru Konvensaun Dili, Tersa 14 Abril 2020.
Entretantu, kareta ambulansia tula sai tan ona passiente moras virus corona (COVID-19) "nain rua" iha loron Tersa 14 Abril 2020 iha horas tuku 9:45 dadersan.
Notisia relevante: Ambulansia Evakua Tan Pasiente COVID-19 "Nain 2" Husi Hotel-Katuas
Dotor Rui mós esplika, kareta bus ne’ebé antes ne’e tula estudante sira husi fronteira Batugade mai to’o Dili hetan seguransa husi polisia, no depois bus ne’e fila husi Dili ba Batugade mós nafatin hetan akompañamentu husi polisia no la tula ema ida.
“Motorista ho nia ajudante nain rua ne’e agora tama ona kuarentena iha Batugade,” nia esplika.
Iha loron Sesta, 10 Abril 2020, rezultadu teste laboratóriu hatudu Timoroan ida positivu infetadu moras virus corona (COVID-19), no tuir fali iha loron Segunda 13 Abril 2020, hatudu tan Timoroan nain 2 positivu, no iha loron Tersa, 14 Abril 2020 hatudu Timoroan nain 2 tan positivu. Husi númeru hirak ne’e hatudu katak to’o oras ne’e Timoroan hamutuk nain 5 mak positivu ona kona-ba moras COVID-19 iha Timor-Leste.
