Índice de Artigos
Oekusipost.com Dili – Pedidu Estadu emerjénsia ba loron 30 nia laran passa ona ho votu unaminidade iha Parlamentu Nasionál.
Xefe Bankada partidu FRETILIN, deputadu Aniceto Guterres husu ba governu atu fasilita ba autor judisiariu sira hodi bele proteze aan husi moras virus corona.
“Iha nia implementasaun ne’e governu tenke iha ekipamentu protesaun ba juiz, projurador no defensor sira hodi labele hetan risku husi virus corona,” hatete deputadu Aniceto iha plenaria PN, Kinta 26 Marsu 2020.
Primeiru-Ministru, Taur Matan Ruak hatan ba preokupasaun deputadu Aniceto nian katak, governu sei halo esforsu maka’as atu kumpri ezijensia sira ne’e.
Entretantu, Prezidente Parlamentu Nasionál (PPN), Arão Noe de Jesus Amaral hatete pedidu Estadu emerjénsia passa ho votu 64, no deputadu husi Partidu Demokrátiku (PD), Adriano Nascimento mak la marka prezensa iha votasaun ne’e.
“Ohin kalan ona, aban Sesta 27 Marsu mak ita foin haruka ba Prezidente Repúblika hodi anunsia Estadu emerjénsia,” hatete Arão.
Durasaun ba Estadu emerjénsia ne’e sei hahu iha oras 00:00 28 Marsu 2020 no termina iha loron Domingo 26 Abril 2020.
Estadu emerjésia ne’e sei kobre teritóriu nasionál no garantia sidadaun sira nia direitu hanesan direitu ba moris, integridade fisika no seluk tan.
