DILI (TOP) — Bankada Partidu Libertasaun Popular (PLP) iha Parlamentu Nasionál kontinua halo akuzasaun hasoru bankada CNRT katak durante ne’e sempre halo esforsu hodi blokeia Orsamentu Jeral Estadu (OJE) ba tinan 2021.
Porta voz plata forma intendimentu entre PLP, FRETILIN no KHUNTO, deputadu Francisco Vas Conselho konsidera pozisaun politiku CNRT nian durante ne’e hatudu dezesperu boot, tanba lakon poder ba ka’er ukun, nune’e tenta uza meiu hotu atu koko blokeia funsionamentu Estadu nian.
Deputadu ne’ebé antes ne’e mós sarani deputadu CNRT sira ho lia-fuan ajaran sesat ne’e hatutan, iha semana hirak liubá bankada CNRT abandona plenaria bainhira debate ba proposta lei númeru 23/v(3a) OJE 2021, no ikus halo rekursu ba Tribunál Rekursu hodi husu fiskalizasaun abstrata no susesiva ba konstitusionalidade no legalidade ba norma sira iha artigu balun. Lei no 14/2020 de 29 de Dezembru.
“Bankada plataforma governu nian konsidera ida ne’e nu’udar aktu dezesperu lakon poder hodi ka’er ukun. Tenta blokeia OJE 2021, nu’udar ran Estadu nian hodi hamoris povu nia moris,” hateten deputadu Francisco liu husi konferénsia ba imprensa iha salaun bankada FRETILIN iha Parlamentu Nasionál, Segunda 18 Janeiru 2021.
“Bankada CNRT nian, liu-liu bainhira haree sira nia pozisaun ne’ebé bebeik konsidera katak orgaun soberania hotu-hotu nia funsionamentu la di’ak no kontra regra konstituisaun no mós dun Prezidente Repúblika katak viola konstituisaun, akuza governu inkapasidade, tanba iha movimentu agora CNRT la ka’er ukun,” nia afirma.
Nia sei lembra, bainhira partidu CNRT ka’er ukun, sira tau ba kotuk regra sira viola konstituisaun hodi tuir de’it sira nia interese ba poder politiku.
“Hanesan terseira lejislatura, Primeiru Ministru señor Kay Rala Xanana Gusmão obriga Parlamentu Nasionál halo ajenda extra-ordinariu ida ho plenaria odamantan taka, sistema taka hotu ba públiku no media, impoin aprovasaun ba rezolusaun hodi duni sai majistradu Portugal nain 40 husi Timor-Leste tanba de’it majistradu balun hahu deskobre indisiu korupsaun governu nian,” nia esplika.
Entretantu, Tribunal Rekursu to’o oras ne’e seidauk fó sai desijaun kona-ba pedidu fiskalizasaun abstratu husi CNRT ba OJE 2021 ne’e inkonstitusional ka konstitusional.
