DILI (TOP) – Konstituisaun Repúblika Demokrátika Timor-Leste (K-RDTL) iha artigu 42 kona-ba liberdade reuniaun no manifestasaun nian.
Númeru dahuluk husi artigu ne’e katak iha garantia liberdade ba ema hotu-hotu ne’ebé hakarak halo reuniaun iha pás no la kaer kro’at, no sira lalika husu uluk autorizasaun. Númeru daruak katak, rekoñese ema hotu-hotu nia direitu ba manifestasaun, tuir lei haruka.
Maske durante ne'e portavoz Rezisténsia Nasionál Defende Justisa no Konstituisaun RDTL (RNDJ-KRDTL), Angela Freitas ho nia ekipa luta maka'as hodi halibur povu iha teritóriu nasionál hodi hatun Prezidente Repúblika (PR) Francisco Guterres Lú-Olo tanba konsidera viola K-RDTL, maibé esforsu sira ne'e lakonsege realiza, tanba Angela rasik husu kansela ba Komandu Jerál Polísia Nasionál Timor-Leste (PNTL), tanba haree ba kestaun seguransa.
Tuir portavoz komandu Jerál PNTL Kaikoli Superentendente xefe Arnaldo Araújo katak, grupu RNDJ-KRDTL kansela asaun pasífika hasoru PR Lú-Olo tanba masa seidauk prontu ba halo asaun pasifiku.
"Ohin marka tan prezensa señora Angela Freitas ho nia grupu iha ne'e, ko'alia kona-ba sira-nia planu atu halo demostrasaun, maibé tanba de'it kestaun seguransa rai laran, tanba ne'e sira rasik husu atu adi'a fali iha futuru," dehan portavoz komandu Jerál PNTL Kaikoli Superentendente xefe Arnaldo ba jornalista sira iha hafoin remata audiénsia ho grupu Ángela nian, Kuarta 02 Setembru 2020.
Komandante ne'e afirma, bainhira mak atu realiza fali, laiha data, maibé grupu RNDJ-KRDTL sei hasoru fali komandu.
"Bainhira mak sira atu halo fali, sira sei mai hasoru fali PNTL. Tanba ne'e iha dia 4 agora sei laiha demostrasaun tanba sira rasik mak kansela, la'ós PNTL mak kansela, tanba de'it sira-nia manifestante sira seidauk prontu atu halo manifestasaun," nia dehan.
Iha fatin hanesan, jornalista sira koko atu konfirma portavoz RNDJ-KRDTL Ángela Freitas kona-ba razaun kanselamentu ba manifestasaun nia iha komandu Jerál PNTL Kaikoli, maibé iha oknum PNTL balun ne'ebé taka dalan ba jornalista sira atu halo entrevista ba señora Ángela Freitas.
Maske kuartel jeral PNTL ne’e nu’udar espasu públiku, maibé oknum polisia sira mós hahu hatudu dadauk ona hodi taka dalan ba imprensa sira.
"Imi labele entrevista nia iha ne'e, imi hakarak entrevista nia, ba iha nia rezidénsia, labele entrevista iha ne'e," oknum PNTL ne'e dehan.
Hafoin liu minutu balun, jornalista sira konfirma portavoz RNDJ-KRDTL Ángela Freitas katak, sira kansela, tanba TL la'o ona ba ditadura.
"Ami kansela ami nia demostrasaun, tanba ita haree ba situasaun horseik nian ne'ebé hahú implementa ona ditadura depois F-FDTL mak halo fali serbisu PNTL nian, entaun halo membru RNDJ-KRDTL iha munisípiu 12 inklui RAEOA kestiona maka'as," dehan Angela.
Angela mós afirma, povu ne'ebé durante ne'e, grupu RNDJ-KRDTL rekolla ona asinatura hamutuk ema na'in rihun atus rua ualu nulu resin hitu, katak maioria povu deskontente ona ho xefe estadu ne'ebé viola ona konstituisaun RDTL.
