KOICA-UNDP tulun ekipamentu prevensaun Covid-19 ba STAE

STAE simu ekipamentu prevensaun Covid-19 husi KOICA no UNDP. Foto Media UNDP.

DILI (TOP) — Ajensia internasional rua iha Timor-Leste hanesan Korean International Cooperation Agency (KOICA) no United Nations Development Program (UNDP) fó ona ekipamentu prevensaun moras virus corona (Covid-19) ba Sekretariadu Tékniku Administrasaun Eleitoral (STAE).

Ulun boot STAE nian, Acilino Manuel Branco konsidera tulun sira husi ajensia rua ne’e pertinente no importante tebes basa bele ajuda STAE uja ekipamentu sira ne’e hodi satan netik moras Covid-19 iha sira nia serbisu lor-loron.

“Ekipamentu sira ne’ebé mak KOICA no UNDP ajudu ita ne’e, pertinente tebes, liliu ba tékniku operador sira, antes tama ba iha sentru atendimentu ba ita nia eleitor sira, utiliza thermometer atu teste nia temperature no hand sanitizer sira balun hodi fase liman, atu promove prevensaun iha ambitu Covid-19 nian,” hateten diretor jeral STAE, Acilino Manuel Branco hateten liu husi nia diskursu iha seremonia entrega ekipamentu sira, iha salaun STAE Kai-Koli Dili, Tersa 28 Jullu 2020.

“Ohin ita mai iha ne’e atu partisipa seremonia intrega material no ekipamentu sira husi ita nia belun sira, husi ita nia parseiru sira, UNDP ne’ebé hetan tulun husi KOICA,” nia afirma.

“Ita haree nudar komitmentu husi ita nia parseiru sira ne’ebé durante ne’e fó sira nia ajuda ba iha orgaun estatal ministeriu STAE, ita hotu hatene katak desde tinan kotuk tinan barak ona, iha tinan 5 no 6 ba kotuk ita infrenta hela prosesu eleitoral lubuk boot ida iha ita nia rain, embora ita nia rekursu mak finansia husi ita nia orsamentu Estadu”.



Nia konsidera, ajensia UNDP no KOICA sira nia kontribuisaun ne’e importante, kontribuisaun sira ne’e mak hetan iha pasadu mai husi maneira oi-oin, asistensia tékniku ninian asesoria ba iha parte legal, no moós ajudu sira material no ekipamentu, apoiu ekipamentu, kapasitasaun hodi eleva funsionariu sira nia kapasidade halo dezepeñamentu ne’ebé mak di’ak.

Apoiu sira ne’e iha area oi-oin Lap top modelu HP 9, thermometer 14, hand washing soap kaxsa 14, water tank and stand 14, hand sanitizer 200ml kaixa 3, hand sanitizer refill 1000ml unidade 14, tissue kaxsa 14.

Reprezentante Rezidente PNUD, Sra.Tuya Altangerel apresia ba vise ministru Estatal no hato’o obrigadu mós ba apresiasaun husi diretor jeral STAE ne’ebé parseiru partisipasional ba parseiru, ne’ebé hamutuk iha tempu naruk nia laran.

Vise - KOICA Timor-Leste Hanul Park afirma “ita hotu hatene katak ita hasoru hela pandemia kovid-19 ba inserteza maibe ita mós tenke hanoin katak labele sakrifika ita nia prosesu demokrásia iha futuru”.

“Tanba ne’e, mak ha’u hakarak kongratula governu Timor-Leste, Ministériu Estatal, ba STAE no mós CNE la’os atu akompaña de’it prosesu Covid-19 ninian, maibé oinsa mak atu bele ajusta, bele hosoru situasaun foun pandemia ida ne’e ho ita nia servisu maka’as. Ita hotu hatene bainhira organizasaun saúde mudial ne’e infrenta ona pandemia Covid-19 hanesan ita boot sira akompaña Koreia hala’o hela eleisaun iha ami nia rain. Ami esplika oinsa mak eleitor sira ne’e bele ba vota, maibé bele tuir nafatin rekomendasaun sira ne’ebé mak Organizasaun Mudial Saúde fó liu-liu distansiamentu sosial atu nune’e bele asegura votu sira ne’e ho demokrátiku, konta mós ho saúde públika,” esplika reprezenta KOICA Hanul Park iha diskursu seremonia intrega material no ekipamentu.

“Ami nia sidadaun bele garantia votu ita hotu-hotu nian, sira ne’ebé mak hela iha uma no sira ne’ebé mak agora dadaun sira iha hela kuarentina sira tenke iha direitu ba votu, tanba ne’e mak ami bele kontente no rejista rezultadu eleisaun ne’ebé mak susesu ho tasa partisipasaun ne’ebé mak boot liu. Ami hanoin katak Timor-Leste sei aban bainrua sei hala’o eleisaun iha nasaun Timor-Leste ba futuru ami hakarak atu introduz esperiensia Koreia nian ita seidauk hatene loloos pandemia ida ne’e bainhira mak atu remata,” Hanul Park konta.

“Ita hotu hatene Timor-Leste la registu ba iha pandemia Covid-19 nian ida ne’e hanesan susesu boot ba ita hotu maibe tenke firmi oinsa mak ita bele ultrapasa sei karik eleisaun aban bainrua akontese,” Hanul apresia.

Iha fatin hanesan, Vise Ministru Estatal haktuir apoiu ne’ebé mak sira fó la’os foin, maibé dala barak mak sira apoiu, sira sempre apoiu bebeik de’it.

“Apoiu ida dadaun ne’e, ita enfrenta situasaun ida ne’ebé Covid-19 nian, maibé sira fó nafatin apoiu atu hala’o serbisu Estadu nian,” hateten Vise Ministru Estatal Lino de Jesus Torezão.

Governante ne’e agradese ba apoiu sira mai husi KOICA no UNDP iha Timor-Leste.

“Ha’u atu hato’o de’it katak ita hakarak hetan eleisaun ida ne’ebé mak di’ak eleisaun ida ne’ebé mak justu, koerente, ho di’ak ba ita nia nasaun primeiru ita tenke iha fasilidade ida ne’ebé mak di’ak hodi apoiu ita nia serbisu atu la’o ba oin. Ho apoiu ne’ebé mak sira fó mai ita ne’e atu garantia ita nia serbisu ita fó apoiu tomak ba ita nia atividade ida ne’ebé mak ita atu hala’o tanba ita iha buat ne’ebé mak minimu material,” nia afirma.

“Ha’u hatete dala ida tan obrigadu barak ba ajensia internasional KOICA no UNDP ne’ebé mak fó apoiu ne’e,” nia agradese.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE