Arsenio Bano fó kareta ba nia feton rasik

DILI (TOP) – Prezidente Autoridade ba Rejiaun Administrativu Espesial Oe-Kusi Ambeno (RAEOA) Arsenio Paixão Bano desidi fó ona kareta Hi-Lux ba nia alin feto rasik Sanchia Florência Paixão Bano (Meta Bano) nu’udar Koordenadora PRADET iha Oe-Kusi Ambeno.

Tuir eis Xefe Gabinete Prezidente Autoridade RAEOA Agustinho Caet konsidera desijaun ne’e hamosu diskriminasaun no favoritizmu, maibé Caet mós espera NGO sira seluk iha Oe-Kusi Ambeno bele hetan mós hanesan PRADET ne’e. Caet nu'udar xefe gabinete iha mandatu Prezidente Autoridade RAEOA José Luis Guterres nian ne'ebé ikus mai ezoneradu husi Primeiru-Ministru Taur Matan Ruak hodi nomeia fali Arsenio Paixão Bano.

Credit: Media ZEESM-TL.

“Maun (Arsenio Bano) entrega hela kareta ida ba nia alin (Meta Bano) atu hala’o serbisu iha RAEOA. Parabens ba parseria ida ne’e hodi proteje vítima feto sira. Espera Autoridade mos bele apoiu tan NGO sira seluk nebe serbisu mate-an ba Povu Atoni, labele hare deit ba kor ho apalidu hanesan mak fahe, tenke fahe hotu ba NGOs no organizasaun sosiedade Sivil sira seluk. Kongregasaun Madre sira mos halibur labarik kbi’it laek barak loos iha Oe-Bau, Padiae, Oe-silo no seluk tan, ne’ebé presiza tebes tulun,” Caet deklara assuntu ne’e iha nia konta media sosial Facebook ne’ebé The Oe-Kusi Post (TOP) asesu Tersa 26 Janeiru 2020.

PRADET Oe-Kusi Ambeno durante ne’e tau matan hela ba vitima violensia domestika, no tau matan mós ba vitima moras mental.

Desijaun fó kareta ne’e la’os husi individual ida ba individual seluk, maibé husi Prezidente Autoridade RAEOA ba Koordenadora PRADET Oe-Kusi Ambeno Florência Paixão Bano (Meta Bano) ne’ebé nia maun-rasik maka Arsenio Paixão Bano atual Prezidente Autoridade RAEOA.

Maske nune’e, maibé tuir informasaun husi pájina ofisial ZEESM-TL temi PRADET nu’udar instituisaun sosial ida iha Oe-Kusi Ambeno. Faktu loloos hatudu iha imajen Arsenio Bano entrega hela dokumentu kareta nian ba Meta Bano, no faktu biolojiku hatudu momoos katak Arsenio Bano nia alin feto rasik maka Meta Bano ne'ebé lidera PRADET iha Oe-Kusi Ambeno.

Credit: Media ZEESM-TL

Prosesu entrega kareta ne’e dirije direitamente husi Presidente Autoridade RAEOA - ZEESM TL, Arsénio Bano, akompaña husi Sekretário Rejionál Adjunto Presidente Autoridade ba Asuntus Sosiais, Maxiamiano Neno, Sekretária Rejionál Edukasaun e Solidariedade Sosial Abelina da Costa no koordenadora PRADET RAEOA, entrega apoio viaturas husi Autoridade RAEOA ba Instituisaun Solidaridade Sosial PRADET – RAEOA iha loron Segunda 25 Janeiru 2021 iha Oe-Kusi Ambeno.

PRADET hanesan Instituisaun Solidaridade Sosial hala’o ninia atividades ba resposta sosiais no fo apoio ba protesaun Vitima sira hanesan Violensia domêstika no violensia baseia ba jénero no mós fó apoiu ba protesaun ba vitima sira inklui tráfiku umanu hetan apoiu husi Autoridade RAEOA E ZEESM TL ho montante orsamento $91.075.00 Mil Dolares Americano liu husi transferensia publika iha OJEE 2020, ne’ebé tuir proposta husi PRADET hodi sosa viaturas 2(rua) ho ninia objetivu atu fasilita serbisu apoiu ba vitimas violensia domestika no violensia bazeia ba jéneru inklui tráfiku umanu iha RAEOA.

Hafoin entrega kareta, Arsenio Bano promete sei fó tan apoiu ba ONG sira seluk liliu ONG sira ne’ebé hala’o serbisu iha área ambiente no seluk tan.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE