Autoridade RAEOA defama PNTL no igreja katolika

DILI (TOP) – Membru Autoriedade sira iha Rejiaun Administrativu Espesial Oe-Kusi Ambeno (RAEOA) oras ne’e hatudu sira nia poder la’os ba povu ki’ik sira de’it, maibé hatudu mós ba autoriedade seguransa sira ne’ebé loron-kalan hala’o lei no orden, no mós hatudu ba igreja katolika iha rai ketan Oe-Kusi Ambeno. 

Prosesu hatudu no loko aan ho sira nia poder ne’e akontese iha loron Kinta 5 Novembru 2020 oras tuku 7:30 kalan iha estrada besik ponte Kruz atu ba diresaun portu Iwao Kitahara Mahata.

Segundu Komandante PNTL RAEOA, Superintendente Polisia, Nicolau Francelino da Costa katak, oras ne’e sei hein hela nia komandante hodi aprezenta keixa ba Ministériu Públiku hodi kontra Segundu adjuntu Prezidente Autoridade no Sekretáriu Rejional ba Sosial, Maximiano Neno (FRETILIN) ne’ebé defama instituisaun Polisia Nasionál Timor-Leste (PNTL), no Igreja Katolika iha Oe-Kusi Ambeno.

Segundu Komandante Nicolau katak, kazu ne'e liga ba kareta estadu tolu ne’ebé hetan asidente trafiku iha loron 5 Novembru liuba.

Normalmente, bainhira iha prosesaun ruma tantu iha kapital Dili no iha fatin ne’ebé de’it, igreja katolika sempre koopera ka husu tulun ba polisia tranzitu hodi regulariza movimentu transporte públiku no privadu iha estrada sira. kooperasaun mutua ne’e mós akontese iha Oe-Kusi Ambeno. 

Komandante ne’e konta, iha tempu ne’eba sarani sira halo hela prosesaun ba Nossa Senhora haleu postu administrativu Pante Macassar. Iha prosesaun ne’e, iha ekipa polisia tranzitu hala’o mós sira nia serbisu hodi regulariza movimentu transporte públiku no privadu sira iha tempu ne’eba. Serbisu ne’ebé sira halo maka blokeia estrada ne’ebé sarani sira ho Nossa Senhora atu liu tuir ba. Sarani sira liu to’o estrada ne’e, Prezidente Autoridade RAEOA, Arsenio Bano ho nia kareta to’o iha fatin ne’e, no nia tun husi kareta husu ba polisia tranzitu sira katak nia bele liu estrada ne’e ka la’e.

“Entaun momentu ne'ebá, komu sarani sira barak, polisia sira dehan señor Prezidente Autoridade ita bele aguenta hein tan itoan ka la'e, tanba ita nia proseisaun sei la'o hela. Entaun kareta rua husi prezidente autoridade nia kareta ne'e soke husi kotuk tanba kareta rua kotuk ne'e, halai ho velosidade makaas,” esplika segundu komandante ne’e ba jornalista sira iha Oe-Kusi Ambeno foin lalais.

Komandante ne’e hatutan, hafoin akontesementu ne’e, Segundu adjuntu Prezidente Autoridade no Sekretáriu Rejional ba Sosial, Maximiano Neno (FRETILIN) tun husi kareta no akuza kedas polisia tranzitu sira, no akuza tan sarani sira katak lori Nossa Senhora ne’e la’o haleu Oe-Kusi Ambeno hodi buka osan de’it.

“Entaun kazu ne'e komandante nia hakarak lori ba iha Tribunál maka deside, tesi no rezolve tanba foin lalais nia ema sira hasai lia-fuan ida ne'ebé maka la merese ba instituisaun PNTL,” nia esplika.

Nia dehan, oras ne’e hein de’it desijaun husi nia komandante hodi aprezenta keixa ba autoriedade judisiariu sira.

“Lia-fuan sira hasai mai ha'u ne'e dehan katak polisia beik ten, polisia la profisional no lia-fuan ne'e hasai direitamente ba iha membru PNTL barak nia oin ne'e públiku,” nia afirma.

Entretantu, TOP tenta ona halo konfirmasaun ba autoridade kompetente, maibé lahetan resposta.

Kareta 3 ne’ebé soke malu ne’e maka hanesan kareta ba Sekretáriu Rejional Adjuntu Prezidente Autoridade ba asuntu Sosial ho nia xapa matrikula, 03-899 ZEESM-TL, Sekretáriu Rejional Administrasaun ho nia xapa matrikula 07-899 ZEESM-TL, no kareta ba Sekretáriu Rejional Komersiu no Industria ho nia xapa matrikula 10-899 ZEESM-TL. 

Notisia relevante: “Ansi” ba jantar kareta 3 soke malu iha Ambeno.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE