REMEXIO (TOP) – Durante ne’e públiku hatene asaun solidariedade no asaun karidade ne’e hala’o de’it husi governu, no lider Karismátiku Kay Rala Xanana Gusmão iha teritóriu nasionál, maibé estudante sira iha eskola Sekundária Santa Madalena de Canossa mós hahu ona hatudu sira nia sentimentu solidaderiedade no domin ba kbi’it la’ek sira iha postu administrativu Remexio, munisipiu Aileu.
Estudante hamutuk nain 314 husi eskola Sekundária Santa Madalena de Canossa durante ne’e tau osan hamutuk, no ikus mai konsege tulun ona kbi’it la’ek nain 40 iha postu administrativu, munisipiu Aileu.
Estudante sira ne'e la'os estuda de'it siensia sira iha sira nia eskola, maibé sira mós buka aprende atu oinsa bele hatudu sira nia solidariedade no domin ba malu, liu-liu ba sira ne'ebé presija. Bele m atenek no maka'as iha siensia oioin, maibé bainhira fuan-laran, no kabun tomak laiha, katak matenek hodi servi ba aan rasik de'it, siensia ne'e la iha valor, siensia ne'e la vale buat ida, siensia ne'e mamuk loos, tanba matenek iha siensia nia sentidu loloos mak atu valoriza ema nu'udar ema moris ida, valoriza ema nu'udar kritura ida. Ema ne'e mai husi hun no abut ida de'it maka kritura Maromak nian.
Osan sira ne’ebé estudante sira tau hamutuk depois sosa nesesidade báziku sira hodi fahe tutan fali ba kbi’it la’ek sira ne’ebé presija iha postu Remexio, no prosesu fahe ka distribui nesesidade báziku hirak ne’e hetan partisipasaun direita husi madre sira husi kongregasaun Canossiana Has-Laran, Manleuana Dili hamutuk ho lider Karismátiku, Kay Rala Xanana Gusmão.
Benefisiariu na’in 40 ne’ebé hetan apou ne’e mai husi Suku, Açumau husi bairro hitu hanesan, Lerolisa, Fatuklot, Tursailefan, Lakmailulu, Aikorema, Nisi Ulun Karahili.
Diretora Eskola Sekundária Santa Madalena de Canossa, Madre Felisidade de Resouricão Fdcc katak, apoiu ne’e oferese husi estudante na’in 314 ne’ebé tau osan hamutuk hodi sosa foos, mina, no super mie hodi fó apoiu ba povu nu’udar sinal domin no agradesimentu ba sira nia programa interkambiu durante loron haat, hahú husi loron 4 to’o loron 6 Novembru 2020.
Madre Felisidade hatutan, durante loron haat, estudante sira ne’e fahe esperensia ba malu ho estudante sira husi eskola Sekundáriu São José Operario Remexio kona-ba metéria importante sira hodi aumenta no hariku sira nia matenek.
“Apoiu sira ne’e oferese hosi ita nia oan estudante sira, tanba ne’e atu ensera estudante sira nia interkambiu ne’e, ami konvida Avó Nana (Xanana) hodi mai hamutuk ho ami atu fahe ami nia domin bai ta nia inan no aman sira,” hateten Madre Felisidade ba jornalista sira iha postu administrativu Remexio, munisipiu Aileu, Sábadu 7 Novembru 2020.
Ho asaun solidariedade ne’e, amu pároko ba Parokia São José Operario Remexio, Giovanni Melo de Sousa hato’o agradese uain ba estudante no madre sira ne’ebé fahe ona sira nia domin ba povu liu husi apoi ai-han báziku.
Nune’e mós liman-ain governu sentral iha postu administrativu Remexio, Jacinto Mendonça hato’o agradese ba madre no estudante sira ne’ebé halo sira nia atividade interkambiu hodi fó apoiu mós ba populasaun sira.
“Avó no maun Boot Xanana mai la’ós tanba ita maka konvida, maibé nia mai atu ajuda ita nia povu sira no ninia vizita ne’e simplesidade hodi rai hela istória di’ak ida ba ita atu ajuda ita nia inan no aman kbi’it la’ek sira,” nia agradese.
Administrador ba postu administrativu Remexio ne’e mós husu ba povu atu kontinua reza hamutuk hodi nasaun Timor-Leste moris hakmatek ho dame hodi dezenvolve nasaun ne’e ba oin ho di’ak liutan.
Entretantu, lider Karismátiku, Kay Rala Xanana Gusmão mós hato’o agradese ba estudante Canossa Manleuana Dili no madre sira ne’ebé halo interkambiu hodi fahe esprensia hamutuk ho estudante sira husi eskola Sekundáriu São José Operario Remexio no apoia ai-han inan no aman sira.
“Imi sira ne’ebé fahe esperiensia ida ne’e, hanesan esperiensia no motiviasaun ba imi nia eskola hodi buka matenek iha futuru. Tanba ohin loron imi sei kiik, tinan hirak tan mai imi maka sei sai boot, ami sei liu ona no imi maka sei ka’er rai ne’e no dezenvolve rai ne’e. Ne’e duni imi estuda-estuda hodi troka esperiensia ba malu,” dehan Xanana.
Xanana dehan, apoia ne’ebé oferese nia fahe de’it, tanba estudante sira hosi eskola Canossa hamutuk ho madre sira maka tau osan hodi sosa foos no mina no super mie hodi fó apoi ba povu, no asaun ne’ebé madre no estudante sira hodi halo ba povu Remexio importante tebes hodi hatudu sira nia solidaridade no domin ba malu.
Eis Prezidente Repúblika ne’e mós dezafia estudante no joventude sira atu hatudu nafatin sira nia esperitu solidaridade hodi kontinua halo asaun ne’e iha fatin seluk.
Xanana konta, misaun Covid-19 ne’ebé nia hala’o hodi perkore Timor-Leste hodi husu ba povu atu proteze aan nafatin hodi bele livre husi ameasa Covid-19.
Xanana hateten ba audiensia sira katak, nia agradese tebes ba Covid-19, tanba ho pandemia Covid-19 ne’e maka obriga nia nia tenki vizita ba área rurál liu-liu fatin ne’ebé nia nunka halo vizita.
Xanana konsidera, asaun ne’ebé estudante sira halo ba ferik no katuas sira nu’udar misaun umanu hodi hatudu domin ba povu.
Antes to'o fatin serimónia, Xanana halo mós inagurasaun ba situs turistiku ne’ebé juventude sira harii iha Remexio vila.
