DILI (TOP) — Prezidente Komisaun G Parlamentu Nasionál ne’ebé hala’o serbisu ba área edukasaun, juventude, kultura no sidadania deputadu António Verdial de Sousa katak Estadu emerjensia ba dala 9 ne’e la taka dalan ba atividade eskolar sira iha rai-laran, maibé tenke kumpri nafatin medida prevensaun Covid-19.
“Ita hotu akompaña ne’ebé Ministeriu Edukasaun Ensinu Superior la taka dalan ba eskola universidade sira atu hala’o prosesu aprendizajen, ita haree liu-liu ensinu superior universidade da paz (UNPAZ) sira hala’o hela prosesu apredizajen hanesan babain,” hateten deputadu Verdial ba jornalista sira iha Parmentu Nasionál (PN), Dili, Kinta 7 Janeiru 2021.
Atual deputadu KHUNTO ne’e rekoñese iha loron hirak liuba, governu liu husi Ministériu Edukasaun desidi suspende provizoriu atividade eskolar iha rai-laran, maibé horsehik hatete fali katak eskola bele la’o bainhira eskola hirak ne’ebé maka preparadu hotu ona.
“Ita fila hikas ba kotuk katak regra sira ne’ebé maka governu halo no sira haruka orgaun ezekutivu sira liu-liu ba eskola sira liuhusi sira nia superior sira hala’o iha terenu tuir mandadu ka ordem ne’ebé hatur husi organizasaun saúde mudial. Kuandu sira preparadu eskola hirak ne’e bele la’o, maibé bainhira eskola hirak ne’e seidauk preparadu labele la’o,” nia afirma.
“Klaru katak eskola nafatin la’o bele maibé eskola sira tenke haree no halo tuir regra sira ne’ebé, maka hatur iha organizasaun mundial ba saúde nian,” nia informa.
Entretantu, antes ne’e iha loron 4 Janeiru liuba, Ministru Edukasaun Juventude no Desportu Armindo Maia desidi suspende atividade eskola nian iha rai-laran, no sei diskute regra prevensaun Covid-19 ho Ministériu Saúde (MS) hodi implementa iha eskola sira iha territóriu Timor-Leste.
“Ita sei diskute ho MS kona-ba implementasaun regra prevensaun COVID-19 iha eskola sira tanba ita mós follow up filafali fasilidade COVID-19 nian ne’ebé mak ita forñese ona ba eskola sira iha fulan haat liuba hanesan bee moos, tanki, balde no dezifekstante para sasán sira ne’e bele utiliza tuir duni nesesidade no kondisaun ne’ebé iha,” Ministru Armindo Maia hateten liu husi konferénsia ba imprensa.
Governante mai husi partidu FRETILIN ne’e katak, regra prevensaun hirak ne’e importante para kombate transmisaun lokál pandemia global Covid-19 bainhira re-ativa prosesu aprendijazen ba estudante sira iha tinan letivu 2021.
Materiál prevensaun Covid-19 ne’ebé antes ne’e governu ho ajensia internasional sira monta iha eskola sira iha rai-laran hanesan tanki bee moos, balde, máskara, dezinfekta ba eskola sira iha territóriu maibé balun a’at ona.
Primeiru-Ministru Taur Matan Ruak katak atividade eskola sira iha rai laran bele la’o ona, maibé tenke kumpri nafatin medida prevensaun Covid-19 nian.
