Oekusipost.com Dili – Koordenador Forsa Tarefa ba Prevensaun no Mitigasaun COVID-19, dotor Segio Lobo, hatete númeru suspeitu ba moras virus corona (COVID-19) iha Timor-Leste oras ne’e aumenta husi nain 64 ba 116, maibé númeru ema sai husi kuarentena boot liu kompara ho sira ne’ebé oras ne’e sei kumpri hela loron 14 iha kuarentena sira iha rai laran.
E is Ministru Saúde ne’e hatutan, dadus to’o ohin kumulativamente hahu desde loron 6 Marsu to’o iha Domingo 12 Abril 2020, iha suspeitu hamutuk nain 116, no kompara ho númeru suspeitu iha loron Sábadu 11 Abril 2020 hamutuk nain 64 de’it.
“Maibé ohin aumenta tan 52,” hatete dotor Sergio liu husi konferensia ba imprensa iha Sentru Konvensaun Dili, Domingo 12 Abril 2020.
Entretantu dadus iha loron Sabádu horseik ema hamutuk nain 883 mak iha hela kuarentena. Maibé, oras ne’e tun ba ema nain 764, no nain 1140 mak sai ona husi kuarente na. Ne’e katak iha ema hamutuk nain 119 mak sai ona husi kuarentena, sira fila ba sira nia uma ona. Dadus sira ne’e hatudu katak maluk sira ne’ebé tama husi fronteira rai-maran no aerportu internasional menus ba dadauk.
“Ne’ebé agora ema sira ne’ebé iha kuarentena ki’ik ho ema sira ne’ebé sai tiha ona,” nia esplika.
Nia konsidera númeru ne’e tun, tanba governu foti ona medidas atu suspende Timoroan sira tama husi fronteira terestre. Medida ida ne’e di’ak fó espasu ba instituisaun Estadu sira hotu ne’ebé serbisu koordenadu iha Sentru Integradu Jestaun Krize atu bele konsentra di’ak liutan no esforsu di’ak liutan ba iha kuarentena ne’e ho di’ak. No mós esforsu atu identifika fatin sira ne’ebé iha potensial mosu hodi bele halo izolamentu ba ema sira ne’e, hodi fó tratamentu d’ak liutan ba sira, no atu evita moras ne’e labele hada’et ba ema seluk.
Kona-bá teste laboratóriu ba suspeitu nain 116 ne’e, tuir dotor Sergio katak nain 2 mak positivu. Ida mak oras ne’e halo hela tratamentu iha sala izolamentu iha Sentru Saúde Vera Cruz, nia kondisaun saúde estavél hela. Ida seluk, tanba teste dala rua tutuir malu negativu, nia fila ba uma ona. Maibé, nia sei kontinua halo auto-kuarentena durante loron 14. Nia tenke kumpri medida distansia sosial, uja máskara no seluk tan.
“Iha nain 52 mak negativu, no iha nain 62 mak sei hein rezultadu teste laboratóriu,” nia esplika.
Horbain ha’at iha Timoroan nain ha’at (4) ne’ebé mak tama klandestinamente mai ita nia fronteira no ohin mós iha nain rua (2) tama klandestinamente, maibé forsa tarefa reasaun rápida foti ona medida adekuadu hodi lori sira mai iha fatin kuarentena.
Preparasaun Sentru Integradu Jestaun Krize nian atu responde ba posibilidade entrada klandestina sira husi fronteira terestre sira di’ak tebes. Polisia Fronteira halo patrullamentu ororas no autoridade lider komunitária sira hetan ona instrusaun klaru atu apoia iha prosesu ne’e tomak.
