Oekusipost.com Dili – Timoroan hamutuk nain tolu ona mak oras ne’e positivu infetadu moras virus corona (COVID-19).
Portavóz Sentru Integradu Jestaun Krize, d otora Odete da Silva Viegas hateten, kazu rejistadu oras ne’e, suspeitu hamutuk nain 168, hein rezultadu teste hamutuk 53, kazu konfirmadu hamutuk ema nain ha’at (4), Timoroan nain 3, no ema husi estranjeiru nain ida ne’ebé oras ne’e hala’o hela auto-kuarentena iha nia uma iha Dili.
“Husi nain 4 ne’e, ita boot sira hatene positivu foun 3, loron hirak liuba iha kazu ida horseik aumenta tan rua. Portantu kazu foun hamutuk tolu, no kazu ida mak rekooperadu. Tanba ida ne’e mak ita bolu, kazu konfirmadu ne’e ema nain 4,” hatete dotora Odete liu husi konferensia ba imprensa iha Sentru Kovensaun Dili, Segunda 13 Abril 2020.
Husi kazu hirak ne’e, ema hamutuk nain 111 mak negativu.
“Kolega rua ne’ebé mak dadauk hetan positivu ne’e tama iha grupu ida kolega ida horbainrua hetan positivu ne’e. Sira ema nain 8 ne’ebé mak halo viajen husi Kupang mai Batugade. Sira ema nain 8 iha kareta Travel ida,” nia esplika.
Nia hatutan, depois husi Batugade ema hirak ne’e sa’e iha bis Maliana nian, iha bis laran ne’e iha ema nain 25. Ida ne’e la inklui kondutor ho nia ajudante (konjak) rua.
“Kazu positivu rua ne’e agora dadauk hamutuk ona iha Vera Cruz. Iha pasiente tolu ona mak iha Vera Cruz,” nia hateten.
Maske nune’e, dotora ne’e hatutan, Timoroan nain tolu ne’e iha kondisaun di’ak hela. Isin manas laiha, no mear mós komesa laiha oan, tanba iha médiku jeral nain rua mak tau matan hela ba sira, inklui infermeira ida inklui médiku espesialista ida ne’ebé delikadu ba iha kazu virus corona ne’e.
Entreantu, tuir informasaun balun ne’ebé Oe-Kusi Post asesu husi ekipa serbisu ambulansia ne’ebé durante ne’e tula pasiente virus corona desde Marsu to’o ohin loron katak, Timoroan nain tolu ne’e sira nia historia viajen husi Kupang, Surabaya no Kalimantan.
