Oekusipost.com Dili - Estudante Timoroan ida ho tinan 22 positivu infetadu moras virus corona (COVID-19), no oras ne'e evakua ona ba hela iha fatin izolamentu iha Senrtu Saúde Vera Cruz, Dili.
Dotor Sergio Lobo hatete, númeru kazu laiha mudansa kompara iha loron Kinta 9 Abril 2020. Husi teste ne'ebé halo, teste 50 ne'ebé halo tiha ona, agora iha ida mak hein rezultadu, iha kazu konfirmadu ida ho kazu negativu hamutuk 48.
Lobo hatutan, kazu positivu ida halo tratamentu iha Vera Cruz, nia teste negativa dala rua tutuir malu. Ne'ebé nia elijibel ona atu fila ba nia uma. La presija halo tratamentu ona, maibé ami konsola nia kuandu to'o iha uma karik nia sei halo auto-kuarentena nafatin.
"Agora iha kazu foun ida husi pasajeiru ne'ebé mai husi fronteira tama tiha ona mai iha ne'e kuaje semana ida. Iha loron liuba mak foin mear, inus metin no horkalan ba halo teste, nia teste positivu, agora nia iha izolamentu," hatete dotor Sergio liuhusi konferensia ba imprensa iha Sentru Konvensaun Dili, Sesta 10 Abril 2020.
Tuir informasaun balun ne'ebé Oe-Kusi Post asesu katak, estudante feto oan ho tinan 22 foin mak semana ida tama karantina iha Hotel Katuas, no durante semana ida nia laran, nia mós kontaktu ona ema barak hanesan sira ne'ebé lori hahan ba nia lorloron inklui nia maluk sira seluk iha fatin karantina ne'e.
Dotor Sergio hatutan, sira identifika ona ema sira ne'ebé halo kontaktu ho Timoroan ne'e, no iha tempu badak sei halo mós ba ema sira ne'e. Nia husu nafatin ba sidadaun hotu atu kumpri nafatin regra sira durante Estadu ermerjénsia. Uja máskara bainhira iha ema barak, mantein distansia sosial, no importante liu mak tenke fase liman bebeik.
"Tanba ida ne'e mak iha potensia hodi hado'ok ita husi virus corona," nia sujere.
