Xanana toba iha estrada Vera Cruz, Alkatiri fó parabéns ba militante FRETILIN

DILI (TOP) – Durante kalan rua ona eis Komandante ein Xefe FALINTIL, Kay Rala Xanana Gusmão desidi toba hein mate-isin Armindo Borges ne’ebé governu tau hela iha sala izolamentu Vera Cruz, no Sekretariu Jeral partidu FRETILIN, Mari Alkatiri liu husi nia konta Facebook fó parabéns ba kuadru no militante FRETILIN hotu iha rai-laran, tanba tur hakmatek iha fatin.

Hun no abut ne’ebé lori eis Primeiru-Ministru, Kay Rala Xanana Gusmão tenke toba horon rai-rahun iha Estrada Vera Cruz, tanba nia la fiar Armindo Borges ne’e mate ne’ebé kauza husi Covid-19, maibé governu liu husi Ministra Saúde, Odete Maria Freitas Belo iha Segunda kedas hakat kedas ba hasoru Xanana iha sala izolamentu Vera Cruz hodi esplika no koko atu konvensa Xanana katak, Armindo Borges nia mate ne’e, tanba Covid-19 duni bazeia ba rezultadu teste swab ho durasaun minutu 15, maibé Xanana la fiar esplikasaun ne’e. Nune’e, mosu ona disputa ba mate-isin ne’e entre Xanana, familia matebian ho governu.

Ho disputa ne’e Xanana hamutuk ho familia matebian toba kalan rua ona iha estrada Vera Cruz desde Segunda to’o Tersa kalan hodi hein atu governu tenke entrega mate-isin ne’e ba familia matebian hodi haloot tuir sira nia lisan, maibé to’o oras ne’e Kuarta dadersan 14 Abril 2021 seidauk iha desijaun ruma husi governu.

Xanana ho familia matebian sira fiar no mantein sira nia pozisaun katak, matebian nia mate ne’e kauza husi moras stroke ne’ebé nia sofre kleur tiha ona.

Matebian Armindo Borges nia oan feto Lourdes de Jesus fó sasin katak, nia aman hetan atakasaun derepente iha loron Domingu lorokraik, no sira ba bolu kedas kareta ambulansia iha Sentru Saúde Komoro no evakua ba Hospital Nasionál Guido Valadares iha Bidau, Toko Baru, Dili.

Lourdes hatutan katak, sira to’o sala emerjensia HNGV iha oras tuku 7 kalan no pesoal médiku sira mós la’os atende uluk matebian nia moras stroke ne’e, maibé imediata lori ba halo teste swab ne’ebé gasta de’it tempu minutu 15 sai mai ho rezultadu positivu Covid-19.

“Ida ne’e maka ami la simu, tanba ha’u nia aman nia mate ne’e, tanba stroke, la’os tanba Covid-19,” hateten Lourdes ba TOP iha sala izolamentu Vera Cruz Segunda 12 Abril 2021.

Prezensa Xanana ho familia matebian iha sala izolamentu ne’e mós konsege atrai joven lubuk ida halo manifestasaun pasifika kontra governu kona-ba implementasaun Serka Sanitária ne’ebé tuir sira katak diskriminativu tebes, no akuza governu durante ne’e politiza maka’as moras Covid-19 iha rai-laran ba sira nia interese politika, maibé governu mós durante ne’e deklara bebeik on aba públiku katak nunka politiza moras ne’e.

Eis Prezidente Repúblika, Kay Rala Xanana Gusmão toba de'it iha estrada Vera Cruz, Dili iha Tersa kalan 13 Abril 2021 hodi hein mate-isin Armindo Borges iha sala izolamentu Vera Cruz, Dili.

Joven sira mós ka’er spanduk hakerek lia-fuan Timor-Leste livre husi Covid-19 no hasai lia-fuan ba Viva ba Xanana, no ezije mós governu tenke entrega ona mate-isin ne’e ba familia matebian hodi haloot tuir sira nia lisan.

Ho situasaun sira ne’e, iha loron Tersa 13 Abril 2021, Sekretariu Jeral partidu FRETILIN, Mari Alkatiri liu husi nia konta Facebook hato’o parabéns ba kuadru no militante FRETILIN sira iha rai-laran, tanba sira tur hakmatek hodi la provokadu ba situasaun sira ne’e.

“Ha’u husu ba ita hotu atu hatudu ida-idak nia maturidade. Ha’u fó parabéns ba povu tomak, fó parabéns ba buiberes ho mauberes hotu, parabéns ba kuadros no militantes FRETILIN hotu tanba tur hakmatek nafatin,” deklara Alkatiri ne’ebé TOP sita husi nia konta Facebook.

“Lalika fó oportunidade ba se de’it atu sobu RDTL, atu impede VIII Governu viabilizadu husi FRETILIN atu lori moris di’ak mai povu Maubere,” Alkatiri afirma.

Alkatiri hatutan, tebes duni Estado tenki rona povu. Ne'e duni maka VIII Governu sei halo. Rona povu no respeita kultura.

“Se maka dehan COVID 19 iha Timor-Leste laiha, nia bosok povu. Nia hakarak de’it uza povu nia sentimentu”.

Alkatiri husu Timor-oan sira funu durante tinan 24, funu kontra se? Nia rasik maka fila hatan nia pergunta ne’e katak, realidade kontra ema no kontra kilat. Maibé, faktu istoria rezistensia hatudu katak desde tinan 1975 to’o 1999 Alkatiri nunka ka’er kilat, tanba hela de’it iha rai-liur (diaspora) iha Maputo, Moçambique.

“Atu manan funu ita simu sakrifisiu oin-oin. Liliu buiberes no maubere rihun atus rua maka fó an ba mate atu defende independênsia. La’os atu defende ema ida ka rua nia ego, nia hakarak deit. Ita luta atu harii Estado de Direito Democrático. La’os atu harii Sociedade Unipessoal. Se de’it maka simu knar hanesan titular orgaun soberania Estado, no Komandu Forsas Estado nian, tenki hatene ida ne'e. Tenki hatene katak atu Defende Estado  prioridade dahuluk. Husik ba kotuk emosaun sira seluk, nostaljia”.

Alkatiri dehan, se la halo tuir dever fundamental ida ne'e, “ita sei loke dalan ba poder anti-Estado atu sobu Estado. Maibé, ha’u hakarak halo klaru de’it katak problema ita hasoru agora iha klinika Izolamentu ne'e teste boot ida ba Estado no nia instrumentu atu implementa Konstituisaun no Lei kontra poder anti-Estado. Tanba ne'e ha’u husu fali ba buiberes no mauberes sira hotu atu hakmatek nafatin. Hakuak bpot ba povu tomak”.

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com

PUBLISIDADE