DILI (TOP) – Rezultadu reuniaun Konsellu Ministru sira ohin desidi tan ona Estadu emerjénsia ne’e aumenta tan ba fulan ida, ho rajaun númeru moras virus corona (Covid-19) iha nasaun viziñu Indonézia, liliu iha Nusa Tenggara Timur (NTT) oras ne’e sa’e maka’as.
“Governu solisita ona Prezidente Repúblika ba extensaun Estadu emerjénsia ba loron 30 tan,” esplika governu liu husi Komunikadu imprensa ne’ebé The Oe-Kusi Post (TOP) asesu iha portal governu, Segunda 25 Maiu 2020.
Estadu emerjénsia daruak sei termina iha loron 27 Maiu 2020, no ho rajaun númeru kazu Covid-19 iha NTT oras ne’e sa’e maka’as mak sai nu’udar rajaun ida ba governu hodi husu ona Prezidente Repúblika atu desidi no anunsia tan Estadu emerjénsia ba datolu.
Entretantu, Estadu emerjénsia dahuluk anunsia iha loron 27 Marsu 2020, no termina iha loron 27 Abril 2020. Husi periodu Estadu emerjénsia dahuluk no daruak, kazu pozitivu iha sala izolamentu oras ne’e laiha ona, no laiha ema ida mate ba moras ne’e.
Governu lalais loos desidi Estadu emerjénsia ne’e ba dala tolu ona, maibé faktu hatudu governu to’o oras ne’e “seidauk realiza” nia promesa sira hanesan apoiu nesesidade báziku sira ba sidadaun sira inklui atu fahe subsidiu osan $100 ba kadaun uma kain sira ne’ebé rendimentu menus husi $500 iha rai-laran.
