RD hit liman karuk ba prokurador iha Tribunal Ambeno

AMBENO (TOP) – Prosesu julgamentu ba kazu violasaun sexual hasoru labarik ho idade menor no violensia domestika ne’ebé involve eis padre RD seidauk to’o nia rohan, tanba sei presija rona deklarasaun sira tantu husi vitima no sasin sira.

The Oe-Kusi Post (TOP) observa, prosesu julgamentu ba loron daruak iha loron Tersa 23 Fevereiru 2021 hahu iha oras tuku 9 dadersan. Julgamentu ne’e, parte Tribunal rona deklarasaun husi eis padre ne’ebé moris iha Pennsylvania, Estadus Unidus Amerika ne’e.

Molok juiz sira tama ba sala julgamentu, parte defensor no advogadu privadu sira iha uluk ona sala laran, no tuir fali maka RD tama ba sala julgamentu no hit liman karuk ba prokurador sira nu’udar jestu komprimenta malu iha sala julgamentu laran, maibé jestu ne’e hatudu de’it ba prokudor sira.

Hafoin hit liman karuk ba prokurador nain-rua ne’e, RD fila kotuk ba sira no hateke fali ba nia advogadu sira molok tur ba kadeira julgamentu nian.

Julgamentu rona de’it deklarasaun husi RD ne’e gasta loron tomak ida. Iha parte dadersan hahu husi tuku 9 to’o tuku 1 meudia, no parte lorokraik hahu fali iha tuku 2 to’o remata iha oras tuku 6 lorokraik.

Rezultadu iha julgamentu loron daruak ne’e maka parte Tribunal desidi hodi kontinua julga kazu ne’e iha loron 22-23 Marsu 2021 hodi rona sasin sira. 

Notisia relevante: Tribunal Ambeno adia julgamentu kazu RD. 

 

  

 

  

 

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE