Ahi han motuk armajen 2 iha Bebonuk

BEBONUK (TOP) – Ahi han motuk armajen rua (2) ne’ebé partense ba kompañia Foho Osan Mean, no UD-Palma iha aldeia Metin 1, suku Bebonuk, postu Administrativu Don Aleixo Munisípiu Dili.

Traballador ida husi kompañia SANMU-LDA, ne'ebé lakohi temi naran aktuir, nia simu informasaun husi komunidade balun ne'ebé hala'o ezersisiu iha tasi ibun katak nia serbisu fatin ahi han motuk ona.

"Hafoin ha'u simu informasaun ne’e, ha'u halai sai ba haree ahi han uluk ona armajen UD-Palma nian ne'ebé nakonu ho ekipamentu ofisina nian hanesan, olio ho roda, depois ahi kontinua lakan maka’as hodi kontinua han ba iha kompañia Foho Osan Mean," traballador ne’e haktuir ba The Oe-Kusi Post iha fatin akontesimentu, Bebonuk, Dili, Domingu 13 Setembru 2020.

Nia hatutan, haree ba ahi komesa lakan maka’as ona, nia mós kontaktu ba Bombeiro hodi husu tulun atu bele rega mate ahi ne’e, maibé ladun hetan resposta lais, tanba liu tiha oras ida resin mak Bombeiro foin to’o fatin akontesimentu.



Informasaun balun ne’ebé The Oe-Kusi Post rekoella iha fatin akontesimentu ne’e katak, armajen rua ne’e la’os kontein de’it sasan ba ofisina no medikamentu, maibé kontein mós material eskolar sira hanesan hanesan livru, kuadru no seluk tan. Sasan sira ne’e kuaje ahi han motuk hotu.

Iha insendiu ne'e trabalador mane ida mós dezmaia no monu kedas iha fatin akontesimentu, hafoin liu minitu balun komunidade sira evakua kedas ba Hospitál Nasionál Guido Valadares (HNGV).

Autoridade sira to’o oras ne’e sei buka tuir hela motivu husi akontesimentu ne’e.  

Ahi han motuk armajen rua iha Bebonuk, Dili, Domingu 13 Setembru 2020.
Jefriano Oqui
Author: Jefriano OquiEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE

Online Counter