Oekusipost.com Dili - Estadu Timor Leste (TL), kondekora títulu póstumu Doutor Daniel John Murphy ho Medalla Orden TL, tuir dekretu Prezidente Repúblika númeru 31/2020 iha loron 16 fulan Abril 2020.
Dekretu ne'e haktuir, uluk iha tempu susar durante prosesu Luta ba ukun-an, ema estranjeiru oioin mak fó kontributu ba ita-nia Luta liuhosi dalan oioin. Ohin loron iha prosesu dezenvolvimentu nasionál, ema estranjeiru oioin mós fó sira-nia kontributu mai ita iha setór oioin.
Ema estranjejru ida neebé hahú kedas hosi tinan 1998 mai hela iha Timor-Leste no halao ninia knaar iha setór saúde mak ita-nia amigu boot Doutor Daniel John Murphy. Ita-nia amigu Matebian ida-nee ninia obra boot ida neebé mak fó ona tulun ba ema rihun ba rihun iha ita-nia rain nee mak Klínika Bairro Pité.
Doutor Daniel John Murphy halo serbisu ho badinas nafatin hodi fó tulun ba ema moras rihun ba rihun durante nee. La’ós de’it fó tulun liuhosi tratamentu no ai-moruk iha ita-nia rai laran. Doutor ne’e mós ajuda ona ema oioin ba halo tratamentu iha rai liur, bainhira laiha posibilidade atu halo tratamentu iha rai-laran.
Klínika Bairro Pit sai fatin mahon ba ema sira ne’ebé halerik tanba hetan moras iha sira-nia isin-lolon. Klínika ne’e nu’udar marka ida hosi obra boot ida ne’ebé mak ema estranjeiru ne’e hatudu ona ho determinasaun boot. Maske hasoru susar oioin, Doutor ne’e kontinua halo esforsu hodi buka dalan oioin atu nune’e Klínika ne’e bele eziste nafatin.
“Ita hothotu iha devér atu rekoñese no valoriza dedikasaun no kontributu boot hirak neebé mak sidadaun estranjeiru nee hatudu ona mai ita hotu durante nia moris iha Timor-Leste,” hatete Prezidente Repúblika, Francisco Guterres Lú Olo liu husi nia komunikadu ba imprensa ne’ebé Oe-Kusi Post asesu, Kinta 16 Abril 2020.
PR Lú Olo hatutan, ohin Estadu no Nasaun tomak fó rekoñesimentu no valorizasaun, liuhosi kondekorasaun Orden Timor-Leste, ba knaar importante hirak neebé mak Doutor Daniel John Murphy hala'o tiha ona.
“Orden Timor-Leste mosu hosi Dekretu-Lei númeru 20/2009, loron 6 fulan-maiu, atu rekoñese ema estranjeiru ka sidadaun nasionál, ne’ebé mak liuhosi sira-nia atividade profisionál, sosiál ka asaun espontánea ne’ebé nakonu ho korajen, fó ona kontributu boot ba Timor-Leste, ba Timoroan ka ba umanidade”.
Nune’e, Prezidente Repúblika, liuhosi proposta Konsellu Agrasiamentu no Orden Onorífika nian, ne’ebé harii liuhosi Dekretu Prezidente Repúblika númeru 13/2013, loron 24 fulan-jullu, no bazeadu ba kompeténsia ne’ebé temi iha alínea j) hosi artigu 85 Konstituisaun Repúblika Demokrátika Timor-Leste, konjuga ho artigu 2, ho artigu 4, númeru 1, no mós ho artigu 5, alínea a), hosi Dekretu-Lei númeru 20/2009, loron 6 fulan-maiu, dekreta: Kondekora, a título póstumo, Doutor Daniel John Murphy ho Medalla Orden Timor-Leste.
