DILI (TOP) – Enviadu espesial xefe estadu, Kay Rala Xanana Gusmão hatete, sente kontente no agradese bele hasoru Santo Pápa Francisco hodi informa durante ne'e Timor Lorosa'e sempre tuir no apoiu programa santidade ninian kona-ba promove dame hodi rezolve konflitu sira iha mundu.
“Ha’u agradese bele hasoru sua-sentidade Pápa Francisco, nia agradese tebes hodi ha’u fó apresu boot tebes ba Timor-Leste, Prezidente no povu tomak, nune’e hodi Prezidente Repúblika nia naran, ha’u fó hatene katak, ita tuir hela atividade sua-sentidade ninian, liu-liu kona-ba atu rezolve funu no buka meius hapara tiha funu iha Ukrania ho rai seluk agora daudaun ne’e,” hateten Xanana iha nia komunikadu ba imprensa.
Enviadu espesial ne'e introduz ba Santo Pápa katak, povu Timor Lorosa'e kontente no sempre akompana atividade lider masimu igreja katolika mundial liuliu wainhira hala'o vizita ba Irake hodi halo aprosimasaun ho relijiaun Islamika no konsidera esforsu ne'e nu'udar aktu ezemplar.
Tuir Xanana, Pápa hatete, Timor Leste merese hetan Kardeál foun hanesan Arsebispu Arkedioseze Metropolitana Dili, Don Virgílio do Carmo da Silva no hanesan Kardeál nasaun seluk ne’ebé sei hetan investidura iha loron 27 Agostu 2022.
Lider unidade nasionál Xanana Gusmão mós hatutan, xefe estadu agradese ba Pápa Francisco ne'ebe sempre temi no promove naran Timor Lorosa'e ba mundu, hodi implementa projetu rezolusaun númeru 93/V(4ª) kona-ba fraternidade umana no koexistensia komum ho umanidade no kona-ba asuntu ida ne'e, lider relijiaun sira iha Timor Lorosa'e hahu koordena malu, hodi realiza programa oin-oin ne'ebe involve juventude sira.
“Iha ami nia konversa, ha’u temi mós kona-ba fraternidade umana hodi dehan katak, iha Timor Leste ita hahú tiha ona programa hirak ne’e, iha fulan sira ne’e no sei hatudu tan iha fulan setembru 2022, no sei buka halo tinan-tinan hodi nune’e, loron ruma prepara aan di’ak liutan, grupu sira hodi relijiaun oin-oin, Katoliku, Kristaun, Musulmanu, Hindu no Konfusiu hodi bele ba aprezenta iha Jakarta, nune’e motiva relijiaun sira seluk bele iha hanoin hadomi malu, respeita malu no kria dame,” fundamenta enviadu espesial xefe estadu.
Tanba, Timor Lorosa'e nu’udar pais ki’ik ida ne’ebé maioria Katolika, sai ezemplu hodi promove nafatin toleransia entre relijiaun no liberdade relijiaun iha nasaun sira, iha Rejiaun ASEAN no ka'er metin prinisipiu hametin dame, hodi tane aas konseitu no prinsipiu Fraternidade Umana ne’ebé Pápa Francisco promove ba mundu tomak.
Enkuantu, iha enkontru kuaze oras ida ne’e, Pápa Francisco defende atu kontinua programa fraternidade umana iha pais hotu, atu hapara ona funu no apresia esforsu Timor Lorosa'e hodi ajuda Pápa nia programa ba promove dame.
“Amu Pápa iha vontade liu, ita sente tebes nia kontente simu delegasaun ofisiál hosi Timor Leste ne’ebé reprezenta Prezidente. Tanba ne’e, ha’u kontente no ha’u dehan ba nia, povu tomak sei reza ba ita boot nia saúde, tanba saída maka Pápa halo, hodi ko’alia hasoru funu, ko’alia kona-ba pas, rekonsiliasaun no ko’alia dame entre relijiaun, buat hirak ne’e presiza korajen bo'ot hanesan Pápa Francisco iha vizaun bo'ot tebes no hanoin luan haree ba mundu ohin loron,” Xanana hateten.
Entretantu, tuir planu, Pápa Francisco sei delega Vise Primeiru Ministru Vatikanu atu vizita Timor Leste iha loron 19 fulan Setembru agora, hodi inaugura Nunsiatura Apostólika Santa Sé iha Motael, Dili, iha loron 21 ne’ebé prosesu konstrusaun remata ona.
Xanana nu'udar reprezentante enviadu espesiál presidente repúblika hato’o ba Santo Pápa hodi povo Katoliko Timor Leste nia naran husu atu halo vizita ba Timor, haktuir mós katak, oras ne'e daudaun Timor Lorosa'e nian reprezentasaun Vatikanu iha Dili sei hala’o serviso hosi Nunsiatura Malazia reprezentante iha Dili hanesan de’it enkaregadu ba negosia hosi reprezentasaun Malazia mai Timor Leste.
“Ho hanoin ida ne’e, Amo Pápa hatan ho dehan, sei estabelese uluk nia reprezentasaun, hodi prienxe kriteria atu sai reprezentante permanente, no mós sei edifisiu ba funsionamentu servisu reprezentasaun Santa Sé nian iha estadu. Ne'ebé ho razaun hirak ne’e Amu Pápa nia Vise Primeiru Ministru hosi Vatikanu sei ba vizita ba Timor Leste atu haree besik liu kondisaun hodi prepara atu sai nu’udar nunsiatura ketak. Iha oportunidade ida ne’e, reprezentante Amu Pápa nian sei halo mós inagurasaun ba edifisiu nunsiatura foun iha Dili,” haktuir Xanana.
Xanana ho Santo Pápa diskute asuntu vizita Timor Lorosa'e
Nune'e, iha oportunidade sorumutu ne’e enviadu espesial xefe estadu ho Santo Pápa diskute mós planu vizita ba Timor Lorosa'e ne'ebe tuir loloos realiza iha tinan kotuk, maibé adia tanba situasaun pandemia no iha posibilidade ajenda ba tinan oin.
“Ha’u husu, posibilidade Pápa atu vizita ba Timor, maibé Pápa esplika katak, nia husu deskulpa, la'e tinan kotuk nia ba tiha ona Timor Leste, maibé tanba moras COVID-19 mósu, maka nia la konsege ba, maibé ami ko’alia ho hamanasa uituan, nia dehan haree to'ok tinan mai ne’e karik bele ba vizita,” informa Xanana.
Nune'e, enviadu espesial xefe estadu, Xanana husu ba povu tomak atu hasa’e orasaun ba Na’i Maromak bele haraik nafatin bensaun no grasa ba Pápa Fransisco nia kondisaun saúde ne’ebé tama ona idade 85.
Ikus, hafoin enkontru ho Santo Pápa ramata, Xanana oferese prendas Timor Lorosa'e hanesan Tais, Kaiba'uk, Morten no kafe ba Sekretariu Estadu Vatikanu, kardeal Pietro Parolin, Msgr. Edgar Parra, suplente ba asuntu jerál Sekretariu Estadu Vatikanu, Sekretariu Relasaun ba Estadu Vaticanu, Arsebispu Paul Gallagher, Sekretary of Relation With States, Joseph Murphy, Head of Protocol of the Vatican no Msgr. Bruno Bastos Lins, Deputy of Head of Protocol.
Enkuantu, delegasaun Timor Lorosa'e ne'ebe akompana Xanana hasoru Santo Pápa Francisco kompostu hosi assesor direitu no politiku prezidente repúblika, Tomás do Rosario Cabral, assesora administrasaun no finansas palasiu prezidente, Dirce dos Reis Amaral, asistente enviadu, Vanessa Pereira, ofisial fotografu media palasiu prezidensial, Eujebio Pereira da Silva no akompana direita hosi embaxadora Timor Lorosa'e ba Vatikanu, Juvita Rodrigues B. Ataide Goncalves ho ekipa protokolu, Sausia Soares no Jennifer Ventanilla.
