ROMA (TOP) - Arsebispu Arkedioseze Metropolitana Dili, Don Virgílio do Carmo da Silva akompaña hosi Padre Ivo Martins Hi da Silva kuarta-feira oras 1:25 too iha Roma-Italia.
Viazen Amu Bispu ho representante deputadu Parlamentu Nasionál nian too Roma simu direita hosi ekipa Protokolu Komunidade Timoroan iha Italia (COMTIL) akompaña hosi Embaixadora Timor-Leste ba Vatikano, Juvita Rodrigues B. Ataide Gonçalves ho ekipa iha Aeroportu Internasionál Leonardo da Vinci.
Embaixadora Embaixadora Timor-Leste ba Vatikano, Juvita Rodrigues B. Ataide Gonçalves hato’o benvindo ba ba bispu Dili ne’ebé hala’o viazen hamutuk ho delegasaun Parlamentu Nasionál.
“Benvindo ho orgullu ami Embaixada hamutuk ho komunidade Timoroan sira bele simu Amu Bispu hamutuk ho deputada sira hodi hala’o viazen hosi Timor-Leste too mai Italia hodi hein prosesu investidura ba ita nia amu bispu nu’udar kardeál dahuluk ho ba Timor-Leste hamutuk ho bispu no nai lulik sira hodi nasaun seluk,” Embaixadora Juvita agradese.
Iha fatin hanesan, Reprezentante Madre Kongregasaun SSpS, Joana Soares hamutuk ho komunidade Timoroan sira sente orgullu bele halo preparasaun solene simu Bispu Don Virgilio ho delegasaun ho atividade simples tara tais no entrega aifuan fresku agradesimentu.
“Ami reprezenta Timoroan tomak organiza hamutuk ho ita nia Embaixadora ho orgullu hodi reprezenta Timoroan tomak ne’ebé hela iha Europa liu-liu iha Italia ho domin boot hato’o ami nia benvindo ba Amu Bispu, tanba agora ami sente la mesak agora mai hamutuk ho ita iha Italia,” dehan Madre Joana.
Entretantu, Arsebispu Arkedioseze Metropolitana Dili, Don Virgílio do Carmo da Silva hato’o agradese ba preprasaun hosi Embaixada Timor-Leste iha Vaticano hamutuk ho Timoroan sira hodi simu nia viazen iha Aeroportu.
“Ha’u agradese ba imi nia preprasaun tomak hodi simu viazen ida ne’e, ha’u hato’o de’it ba ita hotu hato’o agradese ba Nai Maromak nia planu furak sira ba ita nia rain Timor-Leste,” Bispu hateten.
Hosi Aeroportu, ekipa akompaña Arsebispu Arkedioseze Metropolitana Dili, Don Virgílio do Carmo da Silva kontinua ba hela iha rezidensia Kaza de Santa Marta iha Vaticano.
Bispo Don Virgílio sei hela hamutuk ho bispu na’in 2o seluk kompostu husi kandidatu kardeál foun na'in-ualu (8) hosi Europa, neen (6) hosi Ázia, rua (2) hosi Áfrika, ida (1) hosi Amérika Norte, haat (4) hosi Amérika Sentrál no Latina Amérika nian sei hela hamutuk hodi prepara hamutuk serimonia kriasaun ba sai kardiál foun hosi Amu Papa Papa Francisco iha Basilika São Pedro Vatikano.
Don Virgílio sei simu investidura hosi Papa Fransisco sai Kardeál dahuluk iha Timor-Leste nu’udar prezente furak ida hosi Papa Fransisco hodi fó orgullu povu Timor-Leste ne’ebé maioria nu’udar sarani Katolika iha regiaun ASEAN.
