DILI (TOP) – Enviadu espesiál extraordináriu Prezidente Repúlika, José Ramos-Horta nian, Kay Rala Xanana Gusmão desloka ona bá Vatikanu – Roma, hodi partisipa iha serimónia investidura Arsebispu Arkidioseza Metropolitanu Díli ba Kardeál no hasoru malu ho Pápa Francisco.
Kardeál na’in 21 sei investidu husi Pápa Francisco (Jorge Mário Bergoglio) iha loron 27 fulan-Agostu iha Bazílika São Pedro, Vatikanu.
Prosesu nomeasaun kardeál sira, tuir evolusaun istórika ho natureza jurídika kardeál sira nian, sei hala’o knaar hamutuk ho Pápa hodi hala’o servisu atu serbii Sarani no Igreja Katólika.
Tuir karta verbál ho númeru 050-2022, loron15 fulan-Jullu tinan 2022, ne’ebé haruka hosi Sekretáriu Estadu Vatikanu ba Embaixada Timor-Leste iha Vatikanu, Santa Sé ho onra boot simu Lider Istóriku, Kay Rala Xanana Gusmão nu’udar Enviadu Espesiál Prezidente Repùblika, José Ramos-Horta nian hodi hala’o enkontru ho Pápa Fransisco iha loron Kinta, 25 Agostu 2022.
“Pápa Fransisco sei simu Ex-Prezidente Repúblika, Kay Rala Xanana Gusmão iha dadeer (loron 25 Agostu) antes serimónia investidura ba kardeál sira,” haktuir karta verbál hosi Sekretáriu Vatikanu-Roma ba Embaixada Timor-Leste iha Vatikanu.
Prezidente Repúblika, José Ramos-Horta delega Kay Rala Xanana Gusmão nu’udar Enviadu Espesiál Extraordináriu Prezidente Repúlika nian hodi hasoru Pápa hodi diskuti mós projetu rezolusaun númeru 93/V(4ª) kona-ba Fraternidade Umana no Koexisténsia Komun ho Umanidade ne’ebé sita atensaun Pápa Fransisco nian hodi temi naran Timor-Leste ba mundu.
“Ha’u delega Maun Boot Xanana mak sei bá hasoru Amu Pápa, hodi ko’alia mós kona-ba dokumentu Fraternidade Umana ne’ebé ita ratifika ona no sita mós Amu Pápa nia atensaun ba Timor-Leste hodi sai ezemplu ba mundu,” Prezidente Repúblika hateten.
Prezidente Repúblika, José Ramos-Horta dadalia ho Kay Rala Xanana Gusmão iha kios ki'ik ida iha aeroportu Komoro-Dili, Sesta 19 Agustu 2022. Foto TOP/Raimundos Oki.
Tuir ajenda, Kay Rala Xanana Gusmão sei to’o iha Roma iha loron 22 fulan-Agostu no sei simu diretamenta hosi Embaixadora Timor-Leste nian iha Vatikanu no Reprezentasaun Santa Sé.
Iha loron Kinta-feira, 24 Agostu, Enviadu Espesiál Prezidente Repúblika, Lay Rala Xanana Gusmão akompaña hosi Santa Sé sei hala’o vizita ba Koléjio Bispu Timor-Leste nian iha Roma no hala’o mós enkontru ho amu bispu no padre sira.
Entretantu, iha loron 25 Agostu oras tuku 11:30, Kay Rala Xanana Gusmão akompaña hosi Asesór Polítiku ba Prezidente Repúblika, Tomás do Rosário Cabral sei hala’o enkontru formál ho Sua Santidade Pápa Francisco.
Kay Rala Xanana Gusmão konsidera serimónia investidura ne’e nu’udar grasa ba Sarani no Uma-kreda Katólika Timor-Leste no agradese ba Pápa Francisco ne’ebé nomeia ona Arsebispu Arkedioseze Metropolitana Dili, Dom Virgílio do Carmo da Silva, sai kardeál dahuluk iha Timor-Leste.
“Vizita ne’e reprezenta Prezidente Repúblika, José Ramos-Horta hodi partisipa serimónia investidura kardeál sira. Iha Roma, ha’u sei halo enkontru ho Amu Pápa, ne’ebé hili ona Arsebispu Virgílio do Carmo da Silva nu’udár Kardeál primeiru Timor nian,” Xanana hateten.
Tuir ajenda, iha loron Sesta-feira, 26 fulan-Agostu, Lider Istóriku, Kay Rala Xanana Gusmão akompaña hosi Embaixadora Timor-Leste ba Vatikanu, Juvita Rodrigues B. Ataide Gonçalves sei hala’o enkontru ho komunidade Timoroan sira ne’ebé hala’o estudu no hela iha Vatikanu hodi fahe esperiensia ba malu oinsá maka buka hadi’a ekonomia no dezenvolvimentu Timor-Leste nian.
Hafoin ida ne’e, iha loron 27 fulan Agostu, Kay Rala Xanana Gusmão ho ekipa delegasaun ne’ebé akompana hosi Asesór Polítiku Prezidente Repúblika, Tomás do Rosário Cabral sei partisipa iha misa investidura ba Arsebispu Arkedioseze Metropolitana Dili, Dom Virgílio do Carmo da Silva, SDB iha Igreja Basilika São Pedro Vatikanu.
Prezidente Repúblika, José Ramos-Horta ka'er liman ho Sekretariu Jeral Partidu CNRT, Francisco Kalbuadi Lay iha aeroportu Komoro-Dili, Sesta 19 Agustu 2022. Foto TOP/Raimundos Oki.
Iha loron Domingu, 28 Agostu, Komandante em Xefe das FALINTIL, Kay Rala Xanana Gusmão hamutuk ho Timoroan no reprezente kardeál nasaun sira seluk sei partisipa iha misa espesiál ba kardeál sira iha Vatikanu.
Iha finál fulan Agostu, Xanana Gusmão ho Embaixador Portugál iha Roma sei partisipa iha misa agradesimentu ida iha Igreja Universidade Urbania Roma.
Kardeál na’in-21 ne’ebé sei hetan investidura kompostu husi kardeál foun na'in-ualu (8) hosi Europa, neen (6) hosi Ázia, rua (2) hosi Áfrika, ida (1) hosi Amérika Norte, haat (4) hosi Amérika Sentrál no Latina Amérika nian.
Kardeál foun sira ne'ebé Pápa Francisco sei nomea (Kardeál Eleitór Foun) tuir orden Kriasaun maka hanesan:
D. Arthur Roche (Inglaterra), prefeito da Congregação para o Culto Divino e a Disciplina dos Sacramentos (Santa Sé)
D. Lazzaro You Heung sik (Coreia do Sul), Prefeito da Congregação para o Clero (Santa Sé)
D. Fernando Vérgez Alzaga (Espanha), Presidente da Comissão Pontifícia para o Estado da Cidade do Vaticano e presidente do Goveratorado do Estado da Cidade do Vaticano
D. Jean-Marc Aveline (França), Arcebispo de Marselha
D. Peter Okpaleke (Nigéria), bispo de Ekwulobia
D. Leonardo Ulrich Steiner (Brasil), Arcebispo de Manaus
D. Filipe Neri António Sebastião do Rosário Ferrão (Índia), Arcebispo de Goa e Damão
D. Mons. Robert Walter McElroy (EUA), Bispo de San Diego
D. Virgílio do Carmo da Silva (Timor-Leste), Arcebispo de Díli
D. Óscar Cantoni (Itália), Bispo de Como
D. Anthony Poola (Índia), Bispo de Hyderabad
D. Paulo Cezar Costa (Brasil), Arcebispo de Brasília
D. Richard Kuuia Baawobr (Gana), Bispo de Wa
D. William Goh Seng Chye (Singapura), arcebispo de Singapura
D. Adalberto Martínez Flores (Paraguai), Arcebispo de Assunção
D.Giorgio Marengo (Itália), Prefeito Apostólico de Ulaanbaatar (Mongólia).
Cardeal sira ne’ebé nia otas liu 80
D. Jorge Enrique Jiménez Carvajal (Colômbia), Arcebispo Emérito de Cartagena
18. D. Lucas Van Looy (Bélgica), Arcebispo Emérito de Gent
D. Mons. Arrigo Miglio (Itália),
Arcebispo emérito de Cagliari Padre Gianfranco Ghirlanda, SJ, (Itália),
Professor de Teologia Mons. Fortunato Frezza (Itália), Cónego de São Pedro
Kontinente Europa ho totál 107 Kardeál (husi númeru ne’e na’in-54 mak sai eleitór) Kardeál Amerikanu ho totál na’in-60 kardeál (husi númeru ne’e na’in-38 mak sai eleitór) Kardeál Ásia ho totál na’in-30 (husi númeru ne’e, na’in 20 mak sai eleitór) Kardeál Afrikanu ho totál 27 (husi númeru ne’e na’in-17 mak sai eleitór), Kardeal Oceânia hamutuk na’in-5 (husi númeru ne’e na’in- 3 mak sai eleitór).
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
