DILI (TOP) — Embaixadór Filipina ba Timor-Leste, Abdul Maid Kiram Muin hateten Filipina kontinua apoiu Timor-Leste nia esforsu atu tama ba Association of Southeast Asia Nation (ASEAN).
“Ohin loron hasoru prezidente repúblika ko’alia mós kona-ba adezaun Timor Leste ba iha tama ASEAN, maibé ohin loron ne’e ko’alia foku haree ba situasaun iha Timor-Leste nian. Hasoru ne’e señor prezidente iha loos interese hakarak atu Timor-Leste bele adere lalais ba iha ASEAN,” Embaixadór Filipina Abdul Maid ba jornalista sira hafoin hala’o reuniaun ho xefe estadu iha palasiu prezidensiál Dili, Tersa 07 Juñu 2022.
Diplomata Filipina ne’e dehan, pozisaun Filipina ba asuntu TL tama ba ASEAN ne’e Filipina sempre apoiu, tanba estadu no povu rai rua ne’e la’ós de’it amigu maibé sai ona família.
“Filipina sempre suporta tanba iha relasaun di’ak tebes ho Timor-Leste ne’ebé sempre suporta nasaun ne’e tama ka adere lalais ba iha ASEAN,” nia afirma.
Alende ko’alia kona-ba adezaun Timor-Leste ba iha ASEAN, biban ne’e parte rua toka mós asuntu edukasaun liuliu kona-ba estudante bolseiru sira ne’ebé daudaun ne’e sei kontinua estudu iha ne’ebá, nune’e mós ko’alia kona-ba kooperasaun sira hanesan iha setór agrikultura no ekonomia tenki hametin liután hodi bele fó benefísiu ba rai rua ne'e agora no ba iha futuru.
“Durante ne’e ita iha relasaun di’ak, Filipina suporta vistu ba iha estudante Timoroan liu 300 resin ne’ebé ba estuda iha Filipina, no sira balun ramata ona fila fali mai kontinua sira nia servisu iha ne’e. La’ós iha aspetu ne’e de’it maibé iha mós aspetu sosiál ekonomi ne’e mós Filipina sempre apoiu,” nia esplika.
Iha reuniaun ne’e mós tuir embaixadór katak, xefe estadu hato’o agradesimentu ba kooperasaun ne’ebé iha entre rai rua, no promete katak iha tempu badak sei hala’o vizita ba iha Filipina tanba konsidera señor embaixadór, estadu no povu Filipino la’ós de’it amigu baibain maibé nu’udar família ida ba nia no povu Timor Lorosa’e.
Enkuantu, embaixadór Filipina sei termina nia mandatu iha fulan Juñu tinan ida ne’e no tuir planu sei fila hikas ba nia rain iha loron 22 fulan Juñu hodi ba asume fali responsabilidade seluk.
