DILI (TOP)— Embaixadór Repúblika Indonézia iha Timor Lorosa’e, Okto Dorinus Manik hateten, sei halo esforsu hodi halakon tiha barreira sira ne’ebé durante ne’e akontese iha fronteira rai-maran hodi bele fasilita dezenvolvimentu ekonomia nasaun rua nian la’o ho lalais liutan.
Embaixador Okto hatutan, Prezidente Repúblika José Manuel Ramos-Horta husu atu hametin liu-tan kooperasaun liu-liu iha setór ekonomia entre nasaun rua, nune’e promete katak sei halakon barriera ne’ebé fó impaktu ba nasaun rua hodi labele halo mudansa signifikante liuliu iha setór ekonomia.
“Iha hasoru malu ne’e, primeiru Prezidente Repúblika Ramos Horta hakarak hametin liu-tán kooperasaun ho Indonézia liuliu ho provínsia Kupang. Ho kestaun ne’e maka ami sei hala’o vizita ba área sira ne’ebé iha fronteira hodi bele halo netik saida mak bele halo liuliu iha setór ekonomia, atu nune’e bele fó espasu para tranzasaun ekonomia entre rai-rua ne’e bele la’o ho di’ak,” Okto kasu lia hirak ne’e hafoin hala’o audíensia ho Prezidente Repúblika José Ramos Horta, Kuarta 25 Maiu iha Pallasu Prezidensiál Aitaraklaran Bebora-Dili.
Ko’alia ohin ne’e tau hamutuk hanoin oinsá buka mekanizmu ida di’ak hodi halakon dezafiu sira ne’ebé iha hodi hafasil transaksaun iha setór ekonomia bele la’o ho di’ak hodi fó benefísiu direita ba povu rai rua ne’e ninian.
“Ko’alia ohin foku ba área ekonomia tuir hanoin ne’ebé eselensia hato’o, posivel (mungkin) barreira ne’ebé iha hodi sai problema ka halo atividade ekonomia la’o ladún di’ak sei halakon hotu (hanesan livre visto/sem visto ou bebas visa) atu nune’e dezenvolvimentu ekonomia bele la’o di’ak, hodi fó benefísiu ne’ebé hanesan ba nasaun rua, ida ne’e mak konkreta no definitivamente ami bele halo,” nia reforsa.
Nia argumenta tan, “Hanesan mós Ataúro ne’ebé iha poténsia bo’ot ba hala’o negósiu no turizmu. Entaun, Ataúro mós illa ne’ebé fronteira entre tasi ho Indonézia, ha’u sente ida ne’e mós iha poténsia ne’ebé konkreta no la difisil, signifika hosi ne’e ita bele hamutuk halo netik buat ruma hanesan saida mak ita hotu hanoin atu halo iha fronteira rai (Atambua-Motaain)."
