Horta hasoru Papa Francisco diskuti Prêmio Fraternidade Humana 2022

DILI (TOP) – Laureadu Nobel ba Paz 1996, José Ramos-Horta hasoru ona Xefe Igreja Katolika, Papa Francisco hodi ko’alia kona-ba Prêmio Human Franternity iha Vaticano.

Horta hateten, iha loron 6 Outubru 2021, Papa Francisco halo enkontru ho Komisaun Juri Prêmio Zayed ba Fraternidade Humana 2022 iha Palácio Apostólico no elojia sira nia papel iha promosaun prinsipiu fundamental sira kona-ba tolerânsia no fraternidade humana.

Papa sauda enkontru ho Imam Boot Al Azhar, Ahmed Al Tayeb, nu’udar históriku, sai hanesan “hakat dahuluk” iha dalan fraternidade humana.

Entretantu, komite juri Zayed Award for Human Fraternity 2022 (Prêmio Zayed ba Fraternidade Humana 2022) sei hala’o enkontru direita semana ne’e iha Roma, Italia iha ne’ebé membru sira sei diskuti mekanizmu evaluasaun hodi desidi ema ne’ebé maka atu simu prêmio iha tinan 2022 iha edisaun datolu nian husi prêmio ne’e.

Komisaun Juri sira inklui eis Prezidente Níger nu’udar mós vesedor ba Prêmio Ibrahim 2020 iha prestasaun lideransa Afrika, Mahamadou Issoufou, Laureadu Nobel ba Paz 1996 no eis Prezidente RDTL, José Ramos-Horta, eis vise-prezidente Afrika Sul no eis vise-sekretariu jeral ONU, Phumzile Mlambo-Ngcuka, Subsekretáriu ba sesaun Migrantes no Refugiados Santa Sé nian, Cardeal Michael Czerny, Prezidente Projetu Aladdin Leah Pisar, no Sekretariu Jeral Komite Altu ba Fraternidade Humana, Juiz Mohamed Abdelsalam. Komite independente antes ne’e hala’o ona reuniaun via mundu virtual iha loron 10 Agostu tinan ida ne’e hafoin lansamentu nomeasaun prêmio iha loron 1 Jullu 2021.

Durante reuniaun iha Roma, juri sira presija involve iha diskusaun klean kona-ba kriteria nomeasaun ne’ebé simu husi komite durante ne’e, inklui fó oportunidade hodi nomea figura no instituisaun sira husi mundu tomak ne’ebé fó ona sira-nia kontribuisaun signifikante ba humanidade. Sira mós sei diskuti evaluasaun mekanizmu sira iha eleisaun ba sira ne’ebé atu simu premiu ne’e iha tinan 2022.

Prêmio Zayed ba Fraternidade Humana nu’udar prêmio global ida ne’ebé atu rekoñese individu sira, organizasaun sira ho entidade sira ne’ebé halo kontribuisaun klean ba progresu humanu no koesistensia pasifika.

Higher Committee on Human Fraternity (HCHF) maka fó prêmio Zayed ba Fraternidade Humana, nu’udar Komite Internasional Independente ne’ebé estabelese atu promove valor fraternidade humana iha mundu tomak atu kumpri aspirasaun Dokumentu kona-ba Franternidade Humana ne’ebé asina husi Papa Francisco ho Imam Boot Al-Azhar, Ahmed Al-Tayeb iha tinan 2019 iha Abu Dhabi, Emirados Árabes Unidos ho nia patrosiniu Alteza Sheikh Mohamed bin Zayed Al Nahyan, Príncipe Herdeiro Abu Dhabi no patrono ba fraternidade humana. Figura boot rua relijioza ne’e maka simu uluk Prêmio Zayed ba Fraternidade Humana.

Sekretariu Jeral HCHF, juiz Mohamed Abdelsalam hateten: “Ita nia reuniaun ne’e nu’udar oportunidade ida iha valor boot ba komisaun juri hodi diskuti sira nia papel nu’udar komisaun imparsial, atu oinsa ami bele promove prinsipiu Dokumentu kona-ba Fraternidade Humana liu husi ami nia serbisu no ami nia desijaun ba sira ne’ebé atu simu prêmio ne’e iha tinan 2022”.

Prosesu nomeasaun ba prêmio 2022 sei termina iha loron 1 Dezembru 2021. Rezultadu atu simu prêmio sei fó sai iha loron 4 Fevereiru 2022.

Nomeasaun bele halo husi sira ne’ebé priense kriteria liu husi site ofisial Zayed Award of Human Fraternity https://zayedaward.org/

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE

Online Counter