DILI (TOP) – Udan boot ne’ebé akontese desde loron Sesta to’o Domingu semana kotuk, konsege hamate ona ema hamutuk nain 27 iha teritóriu nasionál, husi total ne’e nain 13 husi munisipiu Dili, katak portavoz governu Fidelis Leite Magalhaes.
Fidelis hatutan, reunian inter-ministerial ne’e ba protesaun sivil no dezastre natural ho nia objetivu atu halo koordenasaun, no atu hatan ba impaktu sira hotu husi inundasaun iha semana kotuk nia-rohan.
“Husi inundasaun ne’ebé akontese kauza sasan estragus barak, ema barak sai ba refujia no ema hamutuk nain 27 maka konfirmadu mate, no nain 8 seidauk iha konfirmasaun,” hateten Ministru Fidelis liu husi konferensia ba imprensa iha Palásiu Governu, Dili, Segunda 05 Abril 2021.
“Mate iha Dili hamutuk nain 13, no ema nain rihun 7 resin maka sai deskolakdus ba fatin hamutuk 12 iha Dili laran”.
Nia hatutan, governu oras ne’e halo hela esforsu atu bele responde ba nesesidade báziku vitima sira, no apoiu umanitariu ne’e sei kanaliza bai ha Sekretariu Estadu ba Protesaun Sivil.
“Governu mós desidi ba loja fa’an material konstrusaun sira bele loke ona hodi ajuda familia vitima sira bele sosa material konstrusaun hodi bele harii hikas sira nia uma”, Ministru Fidelis afirma.