Inundasaun iha Dili hamate ona ema lubuk ida

DILI (TOP) – Kuaje mota lolon sia maka loke a’an no sobu rai Dili durante loron Sabádu no Domingu (3-4 Abril 2021) hodi rezulta hoban uma lubuk ida iha Dili laran no hamate mós ema lubuk ida ona.

Udan boot ne’ebé akontese iha loron hirak liuba, hamate mós membru Polisia Nasionál Timor-Leste (PNTL) ida husi Bataliaun Orden Públiku ne’ebé mota lori husi mota Maloa ba hetan fali iha Ai-Tarak Laran. Udan ne’e mós hamozu rai-halai hodi rezulta povu sira husi Ambeno kuaje nain 3 mate iha área Beduku, Komoro, Dili, no mate isin sira ne’e oras ne’e tau hela iha sala mortuariu Hospital Nasionál Guido Valadares (HNGV).

The Oe-Kusi Post (TOP) observa, inundasaun ne’e mós sobu rahun Estrada públiku balun hanesan estrada ida iha área Praia dos Coqueiros besik embaixada Japaun nia oin kotu total, estrada ida liga ba Aileu iha parte mota ulun mós kotu total, Estrada ida besik ponte Komoro atu tun ba Bebonuk mós sai tohik tiha.

Inundasaun ne’e la’os de’it hamate ema no estraga estrada públiku sira, maibé estraga mós komunidade lubuk ida sira nia uma iha Dili laran. Hafoin akontese udan boot, enerjia eletrisidade mós mate, no liña koneksaun internet mós oras ne’e ladun di’ak, inklui pipa fornesementu bee mós hetan estragus hotu. A’at liutan, fatin tau ai-moruk sira iha edifisiu SAMES iha Kampung Alor mós bee hoban hotu, no parte autoridade sira konsege salva ai-moruk balun.

Tuir informasaun ne’ebé iha ema kuaje sanulu resin maka mate iha Dili laran ne’ebé kauza husi inundasaun ne’e.

Kona-ba dezastre ne’e, Prezidente Repúblika, Francisco Guterres Lú Olo hato’o ona nia solidaridade ba familia vitima sira, no husu ba ema hotu atu halo reflesaun ba ukun sira durante ne’e.

Parte balun komenta, situasaun dezastre naturais ne’e aumenta tan serbisu todan ida ba governu atual ne’ebé lidera husi Primeiru-Ministru Taur Matan Ruak no tonka husi partidu Francisco Guterres Lú Olo, no Mari Alkatiri, FRETILIN, tanba durante ne’e esforsu maka’as tebes hodi jere moras Covid-19 labele hamate Timor-oan sira, maibé oras ne’e tenke halo esforsu adisional hodi tau matan ba familia vitima inundasaun tantu iha Dili laran no iha munisipiu sira seluk.

Maske ne’e, husi parte governu mós hahu halo asaun hodi salva komunidade sira hanesan Ministru Obras Públiku (MOP), Salvador Pires liu husi nia pájina ofisial hahu públika nia imajen pessoal ne’ebé infeita ho ekipamentu pezadu sira husi Estadu nian atu hatudu ba públiku katak MOP halo hela serbisu maka’as hodi ajuda vitima sira iha Dili laran, maske rezultadu hatudu seidauk mazimu.

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com

PUBLISIDADE