Oekusipost.com Dili – Durante semana hirak nia laran, folin kombustivél liliu ba gazoliña kada litru ida besik ona ba $5, maibé Prezidente Autoridade ba Rejiaun Administrativu Espesial Oe-Kusi Ambeno (RAEOA), José Luis Guterres mobiliza ona sasan kombustivél ba rai-ketan ne’e.
Diretór Kompañia Versador Shipping, Sansão Gomes katak, durante ne’e autoridade RAEOA no Autoridade Nasionál Pertroléu inklui Diresaun Nasionál ba Transporte Maritima iha kooperasaun hamutuk ho empreza ne’e hodi transporta kombustivél sira ba rai-ketan, Oe-Kusi Ambeno.
“Dala rua ona, dahuluk iha loron 14 Abril liuba, no daruak mak iha loron 23 Abril,” hateten diretór Sansão via kontaktu ba Oe-Kusi Post, Kinta 23 Abril 2020.
“Kareta vaskolante (truck) kuaje 26 mak lori gazoel, no kareta ida spesial ba gazoliña de’it.
Kona-bá transportasaun nesesidade báziku, tuir Sansão katak seidauk bele ho rajaun seidauk hetan autorizasaun husi Autoridade Portuáriu Timor-Leste (APORTIL) no Diresaun Nasionál Transporte Maritima ne’ebé tutela iha Ministériu Transporte no Komunikasaun (MTK) nia okos.
“Depois tama ba Estadu emerjénsia ne’e sira suspende tiha ita nia atividade hotu, inklui ro Nakroma, maibé kona-bá mina ba autoridade nian tanba urjente, entaun ida ne’e mak sira fó autorizasaun hodi tula mina loos de’it,” esplika emprezariu ne’e.
Nia hatutan, antes ne’e MTK ho ekipa komisaun COVID-19 rejista ona ro rua, ro SUCCESS no ro Nakroma Berlin mak atu lori sasan nesesidade báziku ba Oe-Kusi Ambeno, maibé to’o oras ne’e sei hein hela desijaun finál.
Durante ne’e ro SUCCESS mak sempre halo back up ka ajuda halo viajen ba Oe-Kusi Ambeno no Atauro bainhira ro Berlin Nakroma ba halo manutensaun iha Surabaya.
“Agora mós ita apoiu governu iha situasaun ne’e. Tanba ne’e agradese ba konfiasaun husi autoridade RAEOA no liliu ba Diresaun Nasionál ba Transporte Maritima,” agradese Sansão.
