Oekusipost.com Dili – Traballador Timoroan ida ne’ebé isin rua iha Austrália no fila mai Timor iha loron 23 Marsu liuba, to’o oras ne’e sei iha hela kuarentena iha Hotel Novo Horizonte, Meti-Aut-Dili.
Adidu Traballador Timor-Leste ba Austrália António Armindo (Tony) hatete, traballador feto ho naran inisial NM agora sei iha hela fatin kuarentena.
“Nia agora sei iha hela fatin kuarentena, seidauk sai,” hatete adidu traballador Tony via kontaktu telemovél ba Oe-Kusi Post, Sábadu 28 Marsu 2020.
Tuir dokumentu atestadu médiku ne’ebé Oe-Kusi Post iha no asesu prova, trabaladora ho naran inisial NM oras ne’e isin rua no autoridade husi nasaun rua, Timor-Leste no Austrália haruka ona nia fila mai Timor-Leste.
Entretantu, adidu traballador Tony mós rekoñese katak NM isin rua duni, no oras ne’e tama hela karantina durante loron 14 nia laran remata mak foin ba SEPFOPE hodi hato’o informasaun klean liutan kon-bá situasaun ne’ebé nia hasoru.
Nia hatutan, NM foin mak hetan oportunidade Seasonal Worker no ba Austrália iha fulan Janeiru tinan 2020.
Lee mos: Traballador Ida Isin Rua Iha Austrália
