COVID-19: Okupante Hotel Lecidere Ida Positivu

Diretora Jerál Prestasaun Saúde-Ministériu Saúde, Odete da Silva Viegas. Foto TATOLI.

Oekusipost.com Dili – Rezuladu teste laboratóriu hatudu estudante Timoroan ida ne’ebé durante ne’e kumprekuarentena obrigatóriu iha Hotel-Lecidere oras ne’e pozitivu ona kona moras virus corona (COVID-19), no ohin hahu muda ona ba fatin izolamentu iha sentru saúde Vera Cruz hodi hetan tratamentu intensivu molok moras ne’e sai grave iha nia isin lolon.

Diretora Jerál Prestasaun Saúde-Ministériu Saúde, Odete da Silva Viegas kontinua autliza dadus Domingu ohin 19 Abril 2020 katak, kuarentena obrigatóriu no auto-kuarentena hamutuk ema nain 608. Husi númeru fahe ba kuarentena obrigatóriu hamutuk nain 594 ne’ebé fahe tan ba parte rua. Iha Dili hamutuk ema nain 460, no iha munisipiu hamutuk ema nain 134. Iha mós ema hamutuk nain 14 mak oras ne’e kumpre hela kuarentena iha sira nia uma rasik iha munisipiu sira, maibé hetan supervizaun husi pesoal saúde sira. auto-kuarentena iha Dili laiha ona. 

Nia hatutan, Timoroan hamutuk nain 1399 mak kumpre ona kuarentena obrigatóriu durante loron 14 nia laran.

“Total kazu konfirmadu hamutuk nain 19, kazu foun ida. Kazu rekoperadu ka kura ida. Kazu hamutuk ema nain 19, ida mak di’ak ona, portantu ita positivu agora iha nain 18,” hatete dotora Odete liu husi konferensia ba imprensa iha Sala Situasaun Sentru Integradu ba Jestaun Krize iha Sentru Konvensaun Dili, Domingu 19 Abril 2020. 

Diretora Jerál Prestasaun Saúde-Ministériu Saúde ne’e hatutan, iha kazu suspeita hamutuk ema nain 323. Kazu provavel sei mantein nafatin ba ema nain 4, no ema sira ne’ebé sei kontinua hein rezultadu teste laboratóriu iha nain 92. Ema hamutuk nain 208 mak negativu.

“Kazu pozitivu ba ohin loron mai husi Hotel-Lecidere. Alin ne’ebé mak hetan positivu, nia viajen husi Bandung ba Jakarta ho kareta travel iha loron 30 Marsu 2020. Jakarta mai Kupang uja aviaun Batik Air. Husi Kupang mai Atambua nia aluga kareta Avansa, nia mesak. Depois to’o iha Atambua, nia toba kalan ida iha Atambua iha Hotel Timor Travel,” nia esplika.

Nia hatutan, depois sai husi Atambua mai iha fronteira Batugade nia ho ojek motorizada. Husi Batugade mai Dili iha loron 31 Marsu 2020 ho bus Bintang ne’ebé aluga husi Ministériu Saúde husi loron 28-31 Marsu liuba.

Ema sira ne’ebé mai hamutuk ho bus ne’e hotu hela iha Hotel-Katuas, sira hamutuk nain 41.

Entretantu, antes ne’e Koordenador Tarefa Serbisu ba Prevensaun no Mitigasaun COVID-19, dotor Sergio Lobo hatete, maske oras ne’e Timoroan hamutuk nain 17 mak positivu ona kona moras COVID-19 ne’ebé tama iha sala izolamentu, maibé rezultadu teste hatudu iha ema nain rua de’it mak hatudu sintomas, sira seluk seidauk hatudu sintomás, maibé tenke hela nafatin iha sala izolamentu ne’e hodi kontinua hetan tratamentu intensivisu, tanba tuir dotor Sergio katak balun kategoria ba asimtomatiku ne’ebé katak maske virus ne’e iha hela sira nia isin loloon, maibé lahatudu sintomas ruma.

Notisia relevante: Izolamentu Vera Cruz Nain 2 De’it Mak Iha Sintómas 

Ho rezultadu Sábadu horseik no Domingu ohin hatudu, Timoroan hamutuk nain 22 mak oras ne’e simu hela tratamentu intensivu iha sala izolamentu Vera Cruz. Husi númeru ne’e nakfera ba nain 18 mak positivu kona moras COVID-19, no nain 4 sira seluk sei kategoria hela ba kazu provavel. 

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE