Oekusipost.com – Timoroan hamutuk nain 21 mak oras ne’e hela iha sala izolamentu iha sentru saúde Vera Cruz. Entre nain 21 ne’e, nain 17 mak positivu, no nain 4 mak provavel, maibé rezultadu ikus ne’ebé oras ne’e hatudu katak iha ema nain 2 de’it mak hatudu sintomás, no sira seluk la hatudu sintomas, maibé tenke hela nafatin iha sala izolamentu hodi hetan tratamentu intensivu di’ak liutan.
Koordenador Forsa Tarefa ba Prevensaun no Mitigasaun, dotor Sergio Lobo hateten, kona-bá tratamentu, ema balun fahe moras ne’e nia grau ne’e ba nivel tolu, maibé barak liu ema fahe ba nivel lima. Nivel ida mak asintomatiku. Virus ne’e bele iha ema nia isin, maibé la hatudu sintomas. Ida ne’e entre 50%-70%, virus iha hela sira nia isin, maibé la hatudu sira mear ka isin manas. Sira asintomatiku.
Nia hatutan, balun iha sintomas lijeirus, dalaruma inus been de’it, inus metin de’it. Nivel tuir mai mak moras moderadu. Ida ne’e dalaruma bele isin manas boot, dalaruma bele mear maka’as. No nivel ida fali mak nivel grave, ne’e hare hanesan sira ne’ebé dada iis mós susar. Ida ne’e mak presija oxijenu.
“Ita nia maluk sira agora iha izolamentu ne’e tuir dadus ikus liu ne’e, sira nain rua de’it mak iha sintomas. Sira seluk ne’e sintomas laiha, maibé sira tenke iha izolamentu nafatin,” hatete dotor Sergio liu husi konferensia ba imprensa iha Sala Situasaun Sentru Integradu ba Jestaun Krize iha Sentru Konvensaun Dili, Sábadu 18 Abril 2020.
Nia hatutan, kazu positivu ohin nafatin de’it ba nain 17, maibé númeru hein rezultadu mak aumenta ba nain 97. Ho rezultadu ne’e, nia nafatin husu ba sidadaun sira hotu iha rai-laran atu labele pániku demais, maibé tenke mantein aktu hijiene pessoal hanesan tenke fase liman hela de’it, tenke uja máskara bainhira sai ba públiku, no tenke mantein distansia sosial.
