Oekusipost.com Dili – Sentru Integradu ba Jestaun Krize (SIJK) rekoñese gravasaun audio (gravasaun lian) rua ne’ebé sai viral iha plataforma media sosial hanesan iha WhatsApp ne’e loos, maibé interpretasaun ba faktu sira ne’e mak sala.
Koordenador Forsa Tarefa ba Prevensaun no Mitigasaun, dotor Sergio Lobo hateten, kona-bá gravasaun uadio, autora gravasaun ne’e lamenta katak nia kolega sira positivu ne’e lahatudu moras ida, laiha moras ida. No la hasai sira nia ran ida. Lahatene tanba saida mak parte saúde sira derepente halo sira sai pozitivu tiha. Iha fali gravasaun seluk, autora informa katak, ema sira ne’ebé iha izolamentu ne’e toba hamutuk de’it, la halo buat ida, lahetan tratamentu no la simu ai-moruk ida.
“Loos duni, ha’u bele konfirma katak faktu ne’ebé sira aprezenta ne’e loos, maibé interpretasaun mak sala. Interpretasaun ba faktu sira ne’e mak sala,” hatete dotor Sergio liu husi konferensia ba imprensa iha Sala Situasaun Sentru Integradu ba Jestaun Krize iha Sentru Konvensaun Dili, Sábadu 18 Abril 2020.
Nia hatutan, teste sira ne’ebé halo ba sira iha Hotel-Katuas ne’e la’ós ba ema sira suspeitu de’it, maibé teste ne’e halo ba okupante hotu iha Hotel-Katuas ne’e.
“Ne’ebé dala ida tan pessoal saúde sira ne’ebé foti amostra iha Hotel-Katuas ne’e la’ós tanba kolega sira ne’ebé halo protesta iha Hotel-Katuas ne’e ka halo vingansa ba sira, maibé la’e ita aproxima sira bazeia ba desijaun ne’ebé foti hamutuk iha sala situasaun ne’e katak hotu-hotu iha ne’eba ne’e tenke foti teste,” nia esplika.
Nia hatutan, ema sira ne’ebé oras ne’e hela iha sala izolamentu ne’e, tanba bazeia ba rezultadu teste laboratóriu mak hatudu rezultadu iha virus iha sira nia isin lolon.
Ba sira iha kuarentena, ida atu labele hada’et moras ne’e ba ema sira iha laran, no iha liur. No sira ne’ebé iha sala izolamentu ne’e positivu ona, tanba ne’e mak presija izola sira hodi labele hada’et virus ne’e iha rai-laran.
Eis Ministru Saúde ne’e afirma, SIJK komprende tebes nivel stress ne’ebé maluk sira iha kuarentena no iha izolamentu sente agora dadauk, tanba dala barak sira mak ladun hetan informasaun loos, sira mós laiha fasilidade barak ne’ebé sei… tuir sira nia hakarak mós sei falta.
“Ita hotu valoriza sakrifisiu ne’ebé agora sira halo dadauk iha fatin izolamentu no kuarentena,” nia hatutan.
Ho kestaun ne’e nia dehan, Sentru Integradu ba Jestaun Krize sei halo esforsu nafatin atu hadia kondisaun fatin kuarentena no izolamentu inklui fornese informasaun di’ak ba sira hotu.
