MANATUTO (TOP) – Jeneral Reformadu Lere Anan Timor hato’o ona orientasaun ba nia eis Koordenador Ekipa Susesu Eleisaun Prezidensial iha munisipiu Manatuto, David Lay hodi organiza apoiu Lere nian tenke vota ba partidu CNRT iha eleisaun parlamentar 2023 hodi lori hikas nia Komandante em Chefe das FALINTIL, Kay Rala Xanana Gusmão fila ba ukun rai ne’e hodi hadia prosesu dezenvolvimentu nasionál no lori povu ba moris di’ak.
Koordenador Ekipa Susesu Eis Kandidatu Prezidente Repúblika Jeneral Reformadu, Lere Anan Timor, David Lay deklara sira simu ona orientasaun politika direita husi Lere hodi fó votu votória ba Komandante Em-Xefe-das FALINTIL hadia problema nasaun.
“Ami mak uluk apoiu maun Lere Anan Timor Kandidatu ba Prezidente Repúblika 2022-2027 konsege hetan votus, depois ba eleisaun segundu volta, ami deside apoia maun, José Ramos-Horta ba prezidente. Agora ba eleisaun parlamentar, Pai Lere hateten, ninia votus labele so’e, fó fali de’it ba Maun Boot Xanana iha eleisaun parlamentár agora,” David Lay hato’o orientasaun Lere nian iha konsolidasaun partidu CNRT iha salaun Parokia Manatuto-Vila, Sábadu, 11 Fevereiru 2023.
David Lay hatutan, ho orientasaun politika Jenerál Reformadu Lere nian, dadaun ne’e sira sei kontinua la’o hamutuk ho estrutura Partidu CNRT iha Mananatu too baze hodi husu nafatin konfiansa ba povu fó votus CNRT.
“Ha’u hamarik lori ita hotu nia mehi, hanesan Manatuto-oan atu reafirma katak, tempu too ona ba ita la’o hamutuk ho Maun Boot Xanana lori Timor nia futuru ba moris di’ak hodi salva RDTL ema labele kontinua viola konstituisaun RDTL, Reforma Setór Justisa, Ukun hodi di’ak hodi serbi povu, no hadia dezenvolvimentu povu liu husi halo revizaun ba Planu Estrateziku Dezenvolvimentu Nasional (PEDN) hadia ekonomia nasaun no povu moris,” nia hatete.
Nia dehan, tuir orientasaun politika husi Lere Anan Timor obserba katak, Timor-Leste sei kontinua hasoru problema barak, povu sei kontinua moris terus ba bebeik no atu rezolve problema hirak ne’e so vota ba CNRT lori Xanana kaer ukun mak bele hadia problema nasaun ne’e.
Iha fatin hanesan, Prezidente Partidu CNRT, Xanana Gusmão hato’o agradese ba konfiansa husi ekipa vitória Lere Anan Timor iha Manatuto atu serbisu maka’as iha baze hodi lori susesu.
Prezidente Partidu CNRT, Xanana Gusmão.
“Agradese ba imi nia apoiu, ita sei serbisu maka’as para bele hadia rai ne’e,” dehan Xanana.
Iha oportunida ne’e, Xanana fó orientasaun politika ba Koordendór CNRT Manatuto atu serbisu hamutuk ho grupu partidu politiku no organizasaun arte rituál no Movimentu Moqura-X no movimentu seluk tan hodi lori CNRT hetan kadeira 33-ba leten iha Parlamentu Nasionál.
Xanana deklara, ema hirak ne’ebé deside apoia CNRT, tanba sira kumprende CNRT nu’udar partidu politiku ida iha vizaun no programa atu lori nasaun sai husi risku konflitu katak, ba dezenvolvimentu ne’ebé di’ak hanesan nasaun seluk iha mundu.
“Noventa nove (30 Agostu 1999), prova ona katak, maske iha ameasa, balun ema oho dadauk, maibé povu ida ne’e brani tebe-tebes vota CNRT hodi ita ukun aan, tanba povu mak eroi, la’ós Xanana mak eroi. Ne’ebé imi ne’ebé deside mai apoia CNRT tenki hatene katak, CNRT iha vizaun no programa di’ak liu atu hadia povu nia moris no halo dezenvolvimentu ba ita nia rai ne’e,” hateten Xanana.
Konsoliasaun partidu CNRT hetan partisipasaun masimu husi militante CNRT Postu Manatuto Vila, Laleia, Laklubar, Soibada, no Natarbora inklui movimentu organizasaun no grupu partidu politikus sira hanesan, FRETILIN, PD, KHUNTO, PLP, FRENTE – Mudansa.
Movimentu Manatuto-oan mobiliza masa partidu politiku apoia Xanana
Prezidente Partidu CNRT, Kay Rala Xanana Gusmão entrega serifikadu apresiasaun ba Koordenador Manatuto oan, nu’udar mós Prezinte Veteranu Manatuto, Boaventura Soares “Tocha” no Membru FRETILIN Munisipiu Manatuto, Fransisco da Costa “KOHEN” durante konsolidasaun partidu CNRT iha Salaun Parokia Manatuto-Vila, Sábadu, 11 Fevereiru 2023. Imajen/Espesiál.
Movimentu Manatuto-Oan halibur hikas forsa politika husi Partidu FRETILIN, PLP, KHUNTU, PD, PUDD no Organizasaun Arte Marsiál no Rituál hodi apoia Partidu Congreso Nacionál de Reconstrução de Timorense (CNRT) lideradu, Kay Rala Xanana Gusmão kaer fila fali ukun iha eleisaun Parlamentár 2023.
Koordenador Manatuto oan, nu’udar mós Prezinte Veteranu Manatuto, Boaventura Soares “Tocha” deklara forsa politika ne’ebé sira halibur ho hanoin ida apoia CNRT lori Xanana fila ba ukun.
“Ami deklara katak, to'o ona tempu, ami hotu hamutuk ho Maun Boot Kay Rala Xanana Gusmão iha eleisaun parlamentar. Deklarasaun ne’e ami halo, tanba ami lori forsa politika rihun hodi fó susesu ba maun boot,” dehan Tocha durante konsoliasaun partidu CNRT, iha salaun Paroquia, Manatuto-Vila, Sábadu, 11 Fevereiru 2023.
Ekipa komesa tama sai uma komunidade iha Manatuto-Vila, Barique, Laleia, Laclo, Sobaida, Laclubar, Natarbora no fatin seluk tan hodi konvensa povu atu tau hanoin ida de’it.
Prezidente Veteranu Manatu ne’e epela ba veteranus no juventude patriota sira atu hamarik iha fileira ida ho Xanana.
“Ba veteranus no joventude patriota sira hotu, ita mak tenki sai mata dalan ba familia, vizñu no povu tomak iha fatin ne’ebé hodi konkista sira la’o hamutuk ho Maun Xanana,” nia reafirma.
Nia dehan, too agora Manatuto oan seidauk iha jerasaun foun ida atu subtitui lideransa Xanana nia fatin, tanba Timor-Leste presiza tebes Xanana nia matenek ho politika hodi hadia hikas problema nasaun husi nasionál too baze.
FRETILIN Manatuto Apoia Xanana
Iha fatin hanesan, Membru FRETILIN Munisipiu Manatuto, Fransisco da Costa “KOHEN” deklara sira la sai husi FRETILIN, maibé ses aan hodi apoia CNRT lori Xanana ba kaer ukun, tanba lamenta ho desizaun lideransa FRETILIN bainhira vota kontra tratadu tasi Timor-Leste iha Parlamentu Nasionál iha 2019.
“Lider bele barak, maibé Xanana ema ida de’it. Agora ami ses aan mai apoia Maun Xanana tanba ami haree partidu FRETILIN dehan liberta povu, maibé se ita vota kontra fronteira maritima, oinsa mak ó atu liberta povu, tanba ne’e ami FRETILIN Manatuto lasimu atu ema dismistifika Xanana,” dehan KOHEN bainhira halo deklarasaun politika iha Xanana nia oin.
Fransisco da Costa “KOHEN”.
“KOHEN” nu’udar membru FRETILIN ne’ebé besik ho Sekretariu Jerál FRETILIN, Mari Alkatiri ne’e husu deskulpa ba Xanana hodi huu nia ulun no fó perdaun ba nia hahalok sira iha momentu sei iha FRETILIN sempre kontra maka’as Xanana.
“Ha’u husu deskulpa boot ba maun Xanana hu fila fali ha’u nia ulun, ha’u mak uluk sempre kontra ita boot, maibé ohin ha’u mai ho ekipa sei serbisu maka’as atu fó susesu ba ita boot sa’e ba hadia fali ita nia nasaun,” dehan “KOHEN”.
Nia dehan, agora oportunidade ikus ba Manatuto oan iha postu, suku no aldeia fó votus masimu ba Xanana iha eleisaun parlamentar 2023.
Nia husu Xanana bainhira ukun, tenki tau ema ne’ebé matenek mak kaer ukun, la’òs fó fali ba partidu politikus sira seluk hanoin deit mak poder ukun, maibé vizaun atu hadia no dezenvolve nasaun, kakutak mamuk.
Prezidente Partidu CNRT, Xanana Gusmão agradese husi simu membru partidu politikus, FRETILIN, PLP, KHUNTU no partidu seluk tan ne’ebé deside la’o hamutuk ho 22CNRT.
“Ha’u kontente, tanba ita boot sira bele fó fiar mai partidu CNRT tanba CNRT iha prinisipiu no vizaun politika di’ak atu hadia rai ne’e,” dehan Xanana.
Xanana hatutan, nia rasik mós la simu bainhira Sekretariu Jerál FRETILIN Mari Alkatiri orienta Aniceto Guterres no Deputadu FRETILIN iha Parlamentu Nasionál sira vota kontra tiha tratadu fronteira maritima entre Timor-Leste no Austrália.
Xanana dehan, iha kampaña politika mai, nia sei lori dokumentu importante ida kona-ba vizaun no misaun politika CNRT atu hadia rai ne’e hodi povu bele komprende, nune’e sira ba vota iha fatin hotu- hotu, vota ho konfiansa no lori vitória ba CNRT.
Hafoin simu tiha deklarasaun politika membru hirak ne’e hamutuk ho CNRT, Komandante Em-Xefe-das FALINTIL, Xanana entrega mós sertifikadu apresiasaun ba Koordenador Manatuto oan, nu’udar mós Prezinte Veteranu Manatuto, Boaventura Soares “Tocha”.
Membru FRETILIN Munisipiu Manatuto, Fransisco da Costa “KOHEN” no fahe kamiza no bandeira CNRT ba membru hirak ne’e hodi kontinua serbisu maka’as hasoru eleisaun parlamentar 2023.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
