HAU-TEFU (TOP) – Uma kain barak iha teritóriu nasionál mak simu tiha ona subsidiu uma kain ho valor $100, maibé komunidade balun iha fatin balun inklui komunidade hamutuk 216 resin iha aldeia Hau-Tefu, suku Bana-Afi, postu Nitibe, Oe-Kusi Ambeno to’o oras ne’e seidauk simu subsidiu ho rajaun “inkapasidade” serbisu solidariedade sosial rai-ketan ne’e rasik.
Bainhira Kay Rala Xanana Gusmão to’o iha aldeia Hau-Tefu, nia simu kedas informasaun ne’e husi xefe suku katak, nia komunidade sira sei la mate, tanba virus corona (Covid-19), maibé sei mate, tanba moras tensaun.
“Ami sei la mate ba moras virus corona (Covid-19). Ha’u nia komunidade kuaje 200 resin to’o oras ne’e seidauk simu osan subsidiu,” hateten xefe suku Bana-Afi, José Tefa ba Kay Rala Xanana Gusmão bainhira sosializa prevensaun Covid-19 no halo asaun karitativa iha aldeia Hau-Tefu, suku Bana-Afi, postu Nitibe, Oe-Kusi Ambeno, Domingu 23 Agustu 2020.
“Problema seluk ne’ebé ami hasoru mak kondisaun estrada aat tebes, no ponte sira mós laiha. Kuandu iha tempu udan difikulta tebes ami nia movimentu ba mekadu no ba Oe-Kusi Ambeno villa,” nia hateten.
Iha fatin hanesan pessoal apoiu administrasaun suku Bana-Afi, Jacob Tout hateten, antes ne’e governu promete loron 15 tenke selu ona.
“Maibé, to’o ohin loron seidauk simu, loron promesa ne’e liu tiha ona. Agora dehan fali loron 20 mak foin bele simu. Se loron ne’e mak liu nafatin ami sei tun ba husu iha Oe-Kusi Ambeno,” hateten Tout.
Hatan ba preokupasaun ne’e, Kay Rala Xanana Gusmão rejeita deklarasaun husi xefe suku ne’e, tanba tuir Xanana katak durante tinan 24 nia-laran ferik-katuas sira terus, no susar tebes.
“Maibé, sira la mate mohu, balun sei moris to’o ohin loron. Kuandu Covid-19 mak tama iha Hau-Tefu ne’e ka tama iha suku Bana-Afi, aldeia ne’e sei mate mohu hanesan nehek, tanba nasaun dezenvolvidu sira ne’ebé ho sira nia sistema saúde avansadu, iha médiku di’ak, maibé mate naba-naban de’it kada loron,” esplika Xanana hodi kontinua husu ba komunidade sira iha suku ne’e liliu sira husi Kusi tenke koidadu aan nafatin hodi labele kona Covid-19.
Suku Bana-Afi kompostu husi aldeia 3 mak hanesan aldeia Kua-Nobe, Hau-Tefu, no aldeia Nefo-Metan. Suku Bana-Afi ho nia total uma kain 467, ho nia abitante mak 2468 mesak to’os nain de’it.
