Embaixador Turkia lidera sesaun Assembleia Jeral ONU ba dala 75

DILI (TOP) – Kada fulan Setembru xefe Estadu no Xefe governu sira ka Ministru Negósiu Estranjeiru sira husi nasaun membru Organizasaun Nasões Unidas (ONU) sempre ba partisipa asembleia jeral ONU nian iha Nova Iorke, Estadus Unidus Amerika.

Bazeia ba ajenda assembleia jeral ONU ba dala 75 ne’ebé The Oe-Kusi Post asesu, assembleia tinan ida ne’e lahanesan ho assembleia iha tinan kotuk, no tinan hirak liuba ne’ebé xefe Estadu, Xefe Governu ka Ministru Negósiu Estranjeiru sira husi nasaun membru ONU nian prezente fizikamente iha kuartel jeral ONU, maibé tinan ida ne’e hala’o liu husi formatu virtual de’it, tanba impaktu husi pandemia virus corona (Covid-19) ne’ebé sei eziste maka’as iha mundu.

Prezidente Assembleia Jeral ONU tinan kotuk mak Tijjani Muhammad-Bande husi Nigeria, no Prezidente tinan ida ne’e mak diplomata Turkia, Volkan Bozkir ne’ebé antes ne’e nu’udar Ministru ba assuntu Uniaun Europeia husi tinan 2015 to’o 2016. Bokir nu’udar ema primeiru husi Turkia ne’ebé Assembleia jeral. Nia sei assume kargu ne’e durante tinan ida. 

Prezidente Assembleia Jeral ONU ba dala 75, Volkan Bozkir . Foto ONU.

“Ha’u orgullu hodi ha’u nia nasaun nia naran, no mós hodi ha’u nia aan rasik. Ha’u sei serbisu hodi hatudu prezidênsia efikaz no distinta nia hateten ne’ebé The Oe-Kusi Post sita husi portal notisia ONU nian,” Tersa 16 Setembru 2020.

Iha nia deklarasaun iha kuartel jeral ONU bainhira halo enseramentu ba Assembleia Jeral ba 74, nia dehan grupu ne’e iha prioridade urjente tenke rezolve inklui pandemia virus corona.

“Ita nia máskara fó hanoin ba ameasa ne’ebé seriu ne’ebé ita hasoru dadauk. Sira fó hanoin ba ita ba moris ne’ebé lakon, no dezafiu ne’ebé ita tenke rezolve. Sira fó hanoin katak ita hotu iha hela assuntu ne’e nia laran,” nia esplika.

Bozkir hatutan, kritika multilateralizmu sai forte liu ona desde inisiu moras no pandemia, no uja hodi haloos ka justifika medida unilateral sira hodi hafraku sistema internasionál ne’ebé bazeia ba regra sira.

“Presija kestiona kooperasaun internasional. Kritika ida ne’e la’os laiha baze, maibé ninia konklujaun ne’e mak la loos. Labele sala! Laiha nasaun ida mak mesak de’it hodi funu hasoru pandemia ne’e. Distansiamentu sosial ne’e sei la ajuda iha nivel internasional,” nia hateten.

“Unilateralizmu sei hametin de’it pandemia. Ida ne’e sei hado’ok liutan ita husi ita nia objetivu komun” nia esplika hodi bolu responsabilidade atu hametin liutan konfiansa ba kooperasaun multilateral no instituisaun internasional sira ho ONU nu’udar sentru.

Bozkir kuaje tinan 40 nu’udar diplomata iha rai-liur ne’ebé kobre Alemaña, Nova Iorke, Baghdad, Romania.

Iha tinan 2000, Bozkir nu’udar embaixador Turkia ba Uniaun Europeia no mós serbisu nu’udar vise sekretáriu jeral, no sekretáriu jerál ba assuntu Uniaun Europeia iha Ministériu Negósiu Estranjeiru.

Ajenda sira husi loron 17 Setembru – 5 Outubru 2020 sei hala’o liu husi formatu virtual de’it.

Iha sesaun debate jeral ne’ebé hahu husi loron 22-26 Setembru sei hahu ho sesaun ida-idak iha Assembleia Jeral, fornese oportunidade ba lider mundial sira hodi hato’o sira nia deklarasaun ba isu global. Tinan ida ne’e, tanba pandemia Covid-19, Estadu membrum, no observador ONU sira bele submete sira nia deklarasaun video pre-gravadu husi sira nia Xefe Estadu ka Primeiru-Ministru ne’ebé sei loke iha salaun Assembleia Jeral hafoin introduz husi nasaun ida-idak nia delegasaun ka reprezentasaun iha ONU.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE