DILI (TOP) - Iha loron 6 fulan-Abril tinan 2026, Media Internasionál The Guardian públika artigu ho títulu: Private jets, deserted shores and an unbuilt resort: alleged links to sanctioned 'scam' empire revealed in Timor-Leste". Artigu ne'e temi ema husi rai-liur, inklui ema ida ho naran Frank Lin.
Frank Lin maka emprezáriu ida ne'ebé estabelese nia negosiu iha Hong Kong, Japaun, no nasaun sira seluk. Nia negósiu foka liuliu kona-ba teknolojia informasaun, inklui blockchain, no nia halo ona investimentu sira iha nasaun sira iha Ázia nian, inklui Japaun.
“Ha'u simu nia, hanesan ha'u simu investidór sira mai husi nasaun barak iha Ázia no Europa. Lin hahú mai Timor-Leste iha tinan kotuk. Até agora, nia seidauk halo investimentu ruma iha Timor-leste. Hanesan investidór barak, Lin mai ho ideia, planu no mehi atu halo investimentu signifikativu iha Timor-Leste, maski ida-ne’e seidauk konkretiza,” Prezidente Horta hateten liu husi komunikadu ba imprensa iha loron Tersa, 07 Abril 2026.
“Maibé, Lin hatene kona-ba ha'u-nia atividade umanitária sira, ne'ebé buka apoiu loroloron ba ema kiak sira, família, komunidade no estudante sira. Tanba ne'e, nia hahú fó apoiu, inklui laptop sira, ekipamentu desportu nian, roupa no doasaun boot ba bolsa estudu,” Prezidente Horta klarifika.
Prezidente Horta konsidera, artigu sira ne'ebé publika la fornese evidénsia faktuál ruma katak, Lin iha ligasaun ho krime organizadu iha Timor-Leste.
“To'o agora, ita lee de'it alegasaun sira, la ho evidénsia ne'ebé forte. Timor-Leste buka atu atrai investidór sira. Ita labele halo alegasaun bazeadu ba ema sira simplesmente tanba sira mai husi Ázia, hanesan ema hotu husi nasaun sira Ázia nian iha ligasaun ho krime organizadu. Ne'e maka sala boot ida. Lin la halo sala ida iha Timor-Leste. Governu mak sei deside atu simu investimentu ruma ka la’e, no se investimentu ne’e di’ak ba Timor-Leste, entaun Governu sei deside tuir ida-ne’e,” Prezidente Horta esplika.
Iha tinan hirak nia laran, ha'u sempre ko'alia beibeik hodi alerta kona-ba krime organizadu. Iha Timor-Leste rasik, Timor-oan la metidu iha krime organizadu. Maibé, nu’udar nasaun ne’ebé frajil, ita nafatin vulneravel ba ameasa no infiltrasaun husi krime organizadu husi liur. Akontesementu ne’ebé hetan iha Oé-Cusse Ambeno iha fulan balun liu ba hasoru ho intervensaun Governu ne’ebé lalais hodi taka hotu kedas. Governu mós taka ona operasaun jogu ilegál sira iha Díli laran. Oras ne’e daudaun, ha’u la haree krime organizadu ruma instaladu iha Timor-Leste.
Frank Lin la hela iha Timor-Leste; nia rezidensia iha Hong Kong no Japaun.
Hamutuk ho Governu no ita-nia sosiedade tomak, ita nafatin alerta ba perigu sira husi krime organizadu. Maibé ha’u labele simu informasaun ne’ebé mai de’it husi relatóriu mídia nian ka husi ema balun iha Timor-Leste — ema sira ne’ebé hakarak aat ba rai ne’e ka buka atu hafo’er Timor-Leste nia naran, entaun sira rasik mak halo informasaun falsu kontra ema ne’ebé mak hakarak halo investimentu iha Timor Leste.
Hanesan ha'u hatete ona ba Jornal ne’e antes:
"Ita tenke sai ema ne'ebé imperdóavel no inflexível kontra krime organizadu. Ha'u lakon maun-alin sira iha luta ba independénsia no Timor-oan barak maka mate atu nasaun ida-ne'e sai livre. Ha'u lakohi atu nasaun ida-ne'e dominadu husi kriminozu sira."
Ha'u sei kontinua simu investidór sira ne'ebé hakarak mai. Ha'u sei kontinua ko'alia ho ema hotu. Maibé, karik mosu evidénsia ruma ne'ebé konvense ha'u katak investidór ida halo parte iha krime organizadu, Governu no ha'u sei trava sira ho firme no lahó dúvida.
Alegasaun sira ne'ebé laiha fundamentu ne'ebé halo lahó evidénsia hasoru indivíduu ruma sei la simu. Timor-Leste nakloke ba investimentu lejítimu, no ita sei kontinua vijilante nafatin.
