Oekusipost.com Dili – Portavóz Sentru Integradu ba Jestaun Krize, dotor Rui Maria de Araújo hateten, ohin laiha iha kazu positivu ba moras virus corona (COVID-19), maibé kazu suspeita haksoit husi nain 229 sa’e ba nain 236.
“Total kazu konfirmadu nafatin 18 hanesan horseik. Total kazu foun laiha. Kazu suspeitu hamutuk nain 236, horseik iha 229. Kazu provavel mós nafatin de’it hanesan horseik nain 4. Total kazu ne’ebé hatene nia rezultadu hamutuk nain 19, horseik iha 12, ohin sa’e ba 19,” hatete dotor Rui liu husi konferensia ba imprensa iha Sala Situasaun Sentru Integradu ba Jestaun Krize iha Sentru Konvensaun Dili, Sesta 17 Abril 2020.
Nia hatutan, total kazu negativu hamutuk nain 195, nafatin hanesan horseik.
Kona-bá kazu konfirmadu no kazu provavel ne’ebé to’o agora Timor-Leste iha fahe ba grupu ha’at. Grupu primeiru mak grupu Hotel-Katuas nian iha konfirmadu hamutuk nain 16, provavel nain rua. Grupu ida ne’e maioria halo viajen hamutuk iha bus ida iha loron 1 Abril 2020, no sira hotu hela hamutuk iha Hotel-Katuas.
Grupu daruk mak iha Hotel-Fortuna ne’e iha provavel ida, kazu ida ne’e ho ninia kolega sira seluk halo viajen hanesan ho bus iha loron 29 Marsu 2020.
Grupu datolu mak iha Timing Hotel ne’e iha konfirmadu ida. Kazu ida ne’e nia halo viajen ho nus MTCI nian husi Batugade-Dili iha loron 2 Abril 2020.
Grupu ikus nian mak iha Hotel Novo Horizonte. Iha kazu provavel ida. Kazu ida ne’e mós halo viajen ho bus governu nian iha loron 8 Abril 2020, maibé tanba iha tempu ne’eba nia iha sintomas, entaun halo kedas analize no ninia rezultadu hetan provavel.
“Kona-bá sira nain 21 ne’ebé konfirmadu iha 17 ho provavel nain 4. Sira hamutuk agora iha fatin izolamentu iha Vera Cruz. Sira ne’ebé konfirmadu ne’e hela iha fatin ketak, no sira ne’ebé provavel ne’e hela iha fatin seluk,” nia esplika.
