Oekusipost.com Dili – Rezultadu reuniaun Konsellu Ministru sira ne’ebé hala’o iha Sentru Konvensaun Dili (SKD) iha loron Sábadu, 28 Marsu 2020 konsege aprova ona Dekretu Governu ida kona-bá medida ezekusaun Estadu emerjénsia durante fulan ida nia laran.
Antes ne’e, mosu preokupasaun barak hahu husi sidadaun baibain to’o iha politika nain sira iha Parlamentu Nasionál kona-bá risku Estadu emerjénsia, liliu iha ninia ezekusaun iha baze atu labele hamosu fali violasaun boot hasoru sidadaun sira nia direitu, maibé Estadu emerjénsia ne’e katak sei limita direitu balun hodi labele hada’et moras virus corona ne’e iha rai laran.
Nune’e, Konsellu Ministru konsege aprova ona medida ezekusaun Estadu emerjénsia kompostu husi Artigu 33 ne’ebé asina ona husi Primeiru-Ministru, Taur Matan Ruak.
Medida sira ne’e mak hanesan tuir mai ne’e:
SUSPENSAUN:
- Suspende movimentu transporte públiku
- Suspende atividade desportiva sira hotu
- Suspende atividade halibur malu iha grupu
- Suspende atividade festa
- Suspende atividade kultural ne’ebé halibur ema barak
- Suspende vizita mate uma simultanea iha númeru boot, masimu ema na’in 10 de’it
- Suspende ema estranjeiru tama mai teritóriu Timor-Leste
- Sidadaun Timoroan ne’ebé tama mai teritóriu nasioná tenke tama kuarantena
- Individu ne’ebé dezenvolve sintomas CorVid-19 tenke hetan teste husi Ministériu Saúde
- Izolamentu obrigatoriu ba ema ne’ebé afetadu husi CorVid-19
- Izolamentu obrigatoriu ba individu ne’ebé tama teritóriu nasionál no hetan sintomas CorVid-19
- Bandu halo reuniaun no manifestasaun ne’ebé liu ema na’in 5
- Suspende ativiade relijiozu hanesan missa, Sholat, no seluk tan
ATIVIDADE KOMERSIAL:
- Ba individu ne’ebé vizita fatin komersial tenke uza maskara taka ibun no inus
- Fase liman antes tama ba fatin komersiu hanesan ;oja, mini merkadu, supermerkadu, no merkadu
- Mantein distansia minimu metru ida iha fatin komersiu sira ne’ebé temin ona
- Na’in ba fatin komersiu tenke prepara fasilidade fase liman nian
- Na’in ba fatin komersiu labele husik ema ne’ebé Lakumpri regra fase liman no la tau maskara atu tama iha fatin komersiu
- Vendedor ambulante ka Gerobak bele la’o nafatin, maibé tenke kumpri tau maskara no prepara fasilidade fase liman nian.
- Hafoin sosa sasan labele hamarik tesi lia (konta istoria), maibé tenke fila kedas ba uma
Ba Funsionáriu Puúbliku sira mós iha regra ne’ebé sei distribui ba sira, no antes ne’e mós governu desidi ona hodi hamenus prezensa funsionáriu públiku kontratadu, idade 50 resin, no sira ne’ebé moras la presija tama serbisu iha fatin serbisu, maibé bele hala’o serbisu iha uma de’it bainhira superior sira presija.
Sábado, 28 Marsu 2020 22:34
461.76 KB
1.062
