Oekusipost.com Dili - Prezidente Repúblika (PR), Francisco Guterres Lu Olo hato’o agradesementu ba nasaun tolu (3) ne’ebé tulun ona Timor-Leste iha prosesu prevene no kombate moras Coronavirus Disease 2019 (CorVid-19) iha tempu hirak liuba.
Nasaun 3 ne’ebé tulun ona Timor-Leste hodi hasoru pandemia virus ne’e mak hanesan China, Cuba no Austrália.
PR Lu Olo hateten, nasaun sira iha mundu ohin loron luta hasoru inimígu globál Virus Corona, ka koñesidu ho Covid-19, balu iha liu rekursu, maibé nasaun balun la’e. Nasaun ida-idak halo preparasaun hasoru pandemia Covid-19.
Ba Governu Austrália nia apoiu instala laboratóriu ba teste Covid-19 no formasaun ba pesoál saúde, PR hato’o agradesimentu ba tulun ne’e, tanba ho apoiu ne’e, Timor-Leste iha kbiit atu prevene no kombate COVID-19 ho lalais tanba la presiza haruka tan teste ran ba Austrália.
“Prezidente Repúblika sei konta nafatin apoiu husi Governu Australia ninian iha luta hasoru Covid-19,” hatete PR Lu Olo liu husi nia komunikadu ba imprensa ne’ebé Oe-Kusi Post asesu, Segunda 20 Marsu 2020.
PR Lu Olo mós rekoñese, investimentu Kubanu iha área saúde, ohin loron rekoñesidu internasionalmente husi ninia medikemantu sira no Brigada Médiku ne’ebé haruka ba nasaun barak, inklui to’o mai Timor-Leste. Medikamentu sira ne’ebé uza ba hasa’e imunidade hasoru Covid-19 susesu tebes. Tanba ne’e Prezidente Repúblika reforsa pedidu husi VIII Governu Konstitusionál husu asisténsia medikamentu husi Kuba no reforsa Brigada Médika Kubanu iha Timor-Leste.
“Prezidente Repúblika fiar katak Governu Kuba sei hatan pedidu husi Timor-Leste atu enfrenta efeitu husi Virus Corona”.
PR mós felisita Xina ba maneira kombate Covid-19 no asisténsia ne’ebé fó ba nasaun sira afetadu maka’as ho moras ne’e tanba ho kualifikasaun rekursus umanus, medikamentu no instalasaun.
Estadu halo esforsu prevensaun no preparative sira hasoru kondisaun at liu, tanba ne’e, Prezidente Repúblika reforsa pedidu apoiu ekipamentu no medikamentus husi Governu ne’ebé hato’o tiha ona ba Repúblika Popular Xina.
“Governu Timor-Leste sei responsabiliza ba kustu sosa ekipamentu, medikamentu no transportasaun”.
Timor-Leste, liuhusi Ministra interina Saúde deklara kazu pozitivu Covid-19 na’in-ida iha 21 marsu 2020.
Prezidente Repúblika dekreta Estadu Emerjénsia hahú husi 28 marsu ba durasaun fulan ida. Haree husi esperiénsia nasaun seluk nian ne’ebé tarde foti medida preventiva restritu, Estadu foti desizaun ne’e nu’udar dalan di’ak liu ba prevensaun Covid-19 atu salva sidadaun tomak ne’ebé hela iha nasaun ne’e. Deklarasaun Estadu Emerjénsia atu proteje ema no la husik Covid-19 harahun ema ida-idak no Povu no País.
Governu forma tiha ona Komisaun Interministérial ba Covid-19 ho apoiu husi Organizasaun Mundiál Saúde ba prevensaun no kombate moras ne’e iha Timor-Leste. Iha portu entrada sira, Governu harii ekipa tau matan ba sidadaun hotu-hotu ne’ebé tama mai Timor-Leste. Governu harii fatin kuarentena, izolamentu no medikamentus.
Iha 28 marsu, Konsellu Ministru aprova medidas ba regulasaun Estadu Emerjénsia no hahú halo sosializasaun atu sidadaun hotu-hotu bele kumpri.
