Oekusipost.com Dili – Jornalista sira iha Timor-Leste oras ne’e la’ós hasoru de’it ameasa propagasaun pandemia virus corona, maibé hasoru mós ameasa ida husi planu media nain sira atu hamenus sira nia saláriu, maske saláriu maioria ki'ik tebes.
Timor-Leste foin mak rezista kazu positivu infetadu ba moras virus corona, maibé sidadaun hotu iha rai-laran hahu pániku ona to’o “obriga” Prezidente Repúblika, Francisco Guterres Lu Olo tenke deklara Estadu emerjénsia iha loron Sesta, 27 Marsu 2020. No loron tuir mai, governu mós hasai kedas dekretu ida kona-bá medida sira durante Estadu emerjénsia.
Desde loron 1 Abril liuba, atividade hotu iha Dil i laran hahu menus ona, no antes ne’e mós funsionáriu públiku sira hahu hala’o serbisu i ha uma de'it, eskola hotu taka, no misa paskua iha tinan ida ne’e mós taka hotu, maibé jornalista sira kontinua hala’o sira nia kna’ar hanesan baibain.
Tuir observasaun Oe-Kusi Post, iha media balun mak prepara no fornese ekipamentu protesaun ba nia jornalista sira hanesan maskára, sanitizer, maibé durante loron hirak nia laran hahu mosu ona ameasa foun ba sira.
“Ami nia xefe sira informa ona ami katak sei ko’a ami nia saláriu ho rajaun rendimentu menus,” hatete Jornalista ida ba Oe-Kusi Post iha edifisiu Konsellu Imprensa, Dili, Tersa 2 Abril 2020.
Jornalista ne’ebé lakohi temi nia identidade hatutan, sira nia koresponde iha munisipiu rua mós hapara tiha ona tanba transporte laiha atu lori jornal ba.
“Horseik ami nia xefe husu ba ami katak, imi konkorda ho desijaun ne’e, ami hotu nonok de’it,” nia esplika.
Jornalista ida husi media boot ida mós katak, nia serbisu fatin iha ona planu atu ko’a nia saláriu to’o pur sentu 50 (50%) ho rajaun hanesan. Kompañia media nia rendimentu menus maske Estadu emerjénsia ne’e foin mak to’o semana ida.
Hatan ba kestaun ne’e, reprezentante media nain (tuir loloos asosiasaun media) ba Konsellu Imprensa atual nain ba Timor Post, Konselleiru José Ximenes hateten, media sira hahu hasoru difikuldade iha krize politika ne’ebé akontese iha tinan 2017.
Eis diretór Timor Post ne’e mós fó sala ba situasaun krize politika iha rai-laran mak provoka rendimentu media sira menus.
“Ijemplu, iha media balun mak planeia atu ko’a jornalista nia saláriu. Ida ne’e jestor sira mak hatene klean liu, maibé tuir ha’u nia observasaun jeral liliu iha situasaun Estadu emerjénsia laiha transporte, distribuisaun jornal ba munisipiu sira mós la la’o. Saida mak akontese iha Dili laran de’it,” esplika fundador Jornal Timor Post ne’e.
“Situasaun ida ne’e mak fó ba media sira, no desde tinan 2018 mós media balun hamenus ona sira nia pájina, no ikus mai Timor Post mós hamenus ona pájina rua desde 2 Abril 2020”.
Entretantu, reprezentante Timor-Leste Press Union (TLPU) ba Konsellu Imprensa, Francisco Simões Belo husu ba media nain sira tenke fornese fasilidade prevensaun ba jornalista sira.
“Ha’u nia sujestaun ba media nain sira tenke proteze jornalista sira bainhira hetan orientasaun ruma husi redasaun atu ba halo kobertura ba pandemia virus corona,” nia sujere.
Editor Ajensia Notisioza TATOLI ne’e mós sujere ba media nain sira tenke hanoin didi'ak bainhira desidi atu hamenus jornalista sira nia saláriu.
“Husu ba media nain sira atu tetu ho didi’ak molok foti desijaun hamenus jornalista sira nia saláriu, liliu ba jornalista sira ne’ebé hala’o serbisu oras 24 nia laran iha situasaun Estadu emerjénsia hanesan agora, tanba sira nia vida iha hela risku boot nia laran”.
