DILI (TOP) — Embaixador Estadus Unidus Amérika (EUA) ba Timor Leste Charles Kevin Blackstone hateten, United State Agency for International Development (USAID) apoiu osan hamutuk milaun $ 93 ba programa dezenvolvimentu iha Timor-Leste (TL) ba periodu tinan lima.
Embaixador Blackstone katak, relasaun bilateral entre rai-rua ne’e di’ak tebes durante ne’e iha área oioin.
“Ha’u hakarak hatete programa anunsia ohin husi programa kooperasaun USAID nian ba tinan lima ne’ebé ho montante milaun $ 93. Programa ida ne’e, sei halo koperasaun ho ministeriu sira. Tuir ita boot sira-nia governu hodi bele responde atinje prioridade sira ne’ebé estabelese husi ita bo’ot sira nia governu,” hateten embaixador Blackstone ba jornalista sira iha Palásiu Governu, Dili Kinta 25 Marsu 2021.
Nia esplika, iha programa foun ne’e sei konsentra ba ba dezenvolvimentu ekonomiku, dezenvolvimentu iha sosiadade ne’ebé konsentra ba grupu joven sira, feto sira no grupu sira ne’ebé vulneravel ka marjinalizadu.
“Ita boot sira hotu hatene programa USAID nian hanesan ida de’it husi programa lubuk ida ne’ebé Estadus Unidus oferese ba Timor-Leste. Ita boot sira hatene katak ami nia programa sira ne’ebé oferese husi embaixada husi korpu da paz no forsa armadas Estadus Unidus Amerika nian,” nia informa.
Nia hatutan, hanesan ohin Primeiru-Ministru mensiona, apoiu sira ne’ebé fo apoiu ba Timor-Leste tanba nasaun rua kompartilla fahe ba malu valor no prinsipiu sira ne’ebé hanesan, ezemplu komprimisiu ba prosesu demokrátiku, protesaun no direitu umanu no governasaun di’ak.
Milaun $ 6 ba Covid-19
EUA mós apoiu osan hamutuk milaun $ 6 ba prevensaun moras Corona virus 2019 (Covid-19).
“Ha’u mos hakarak mensiona kona-ba apoiu importante lubuk ida ne’ebé mak Estadus Unidus fornese ona ba Timor-Leste iha área kuidadu saúde nian. Dezde tinan 2020 to’o tinan 2021 fornesse ona área dezenvolvimente kuidadu ba saúde nian ho osan montante milaun $ 6”.
Blackstone hatutan, projetu balun planeia hela atu konkretiza iha tempu tuir mai.
