DILI (TOP) — Politikamente no juridikamnete hatudu, governasaun atual ne’ebé lidera husi Primeiru-Ministru, Taur Matan Ruak la’os governu foun ka governu dasia (IX) nian, maibé governu daualu (VIII) ne’ebé hetan lejitimidade popular liu husi festa demokrásia iha fulan Maiu 2018.
Loos duni, programa atu loke kampu serbisu foun hamutuk 60.000 kada tinan nu’udar programa partidu politiku tolu nian ne’ebé hamutuk iha Aliansa Mudansa ba Progresu (AMP). Partidu tolu hanesan Partidu Libertasaun Popular (PLP), partidu CNRT no partidu KHUNTO durante periodu kampaña eleitoral ba eleisaun antisipada, sira uja loke kampu serbisu foun 60.000 tinan-tinan nu’udar iska ida hodi hetan poder, no hetan kadeira. Ikus mai sira konsege hetan duni vitoria hodi forma governu konstitusional daualu ne’ebé la’o to’o dalan klaran tenke ses malu tiha, tanba mosu diferensia entre sira, no ikus mai involve mós partidu FRETILIN hodi viabiliza (tonka) governasaun daualu ne’e bele ‘to’o nia rohan’.
Programa no promesa atu loke kampu serbisu foun hamutuk 60.000 ne’e la’os riku soin partidu ida nian, maibé partidu tolu nian, no riku soin governu daualu nian, la’os governu dasia.
Oras ne’e saida maka akontese ona ho promesa ne’e? politiku nain sira sempre matenek hodi hases aan husi promesa ne’ebé sira rasik maka promete.
Promesa midar ne’e nakfilak ba promesa moruk, no nakfilak ba kilat musan ida ba bankada CNRT iha Parlamentu Nasionál.
Iha loron Tersa 20 Outubru 2020 bainhira eis Ministru Reforma Lejizlativa no Asuntu Parlamentár (MRLAP) atuál Ministru Prezidénsia Konsellu Ministru, Fidelis Manuel Leite Magalhães la hanoin, no la imajina katak promesa midar ne’e bele nakfilak ba bala musan ida ba nia iha sesaun debate ba programa rekuperasaun ekonomia.
Deputada bankada CNRT, Veneranda Lemos kontinua kestiona no sisi promesa loke kampu serbisu foun 60.000 ne’e ba governante husi PLP ne’e.
“Señor ministru Fidelis nia deklarasaun iha tempu liubá sei loke kampu traballu 60 mill ba timoroan sira, to’o oras ne’e ema hirak mak servisu ka hasai hodi hatama,” deputada Lemos husu Ministru Fidelis iha sesaun debate iha Parlamentu Nasionál Tersa 20 Outubru 2020.
Deklarasaun deputada Lemos nian ne’e halo Ministru Fidelis hanesan fuan tuku-tuku no sente isin nakdedar itoan hodi tenke klarifika no hatan kedas ba kestaun ne’e.
“Ha’u halo defeza onra ida relasiona ho intervensaun balun ohin hosi deputadu bankada CNRT nian, relasiona ho 60 mill kampu traballu ne’e la’ós na’in mak ha’u, Fidelis Magalhães, na’in mak Aliansa Mudansa ba Progresu (AMP) ne’ebé implika na’in mak CNRT,” Ministru Fidelis defende aan ho lian maka’as itoan.
Governante mai husi munisipiu Bobonaro ne’e kontinua defende aan katak, loos duni iha tempu ne’eba nia nu’udar MRLAP ne’ebé iha devér tomak atu fó-sai programa governu nian.
Ministru Fidelis kontinua esklarese katak, programa kriasaun kampu traballu ne’e asina hosi lideransa másimu AMP nian kompostu husi Kay Rala Xanana Gusmão, Taur Matan Ruak no José Bukar “Naimori”.
“Ha’u tenke ko’alia sai buat loos. Buat loos maka ita ba kampaña ita lori livru oan ne’e ita aprezenta ba povu tomak iha ita-nia rai katak sé ita manán hodi ka’er ukun karik kria kampu traballu ho numeru 60 mill kada tinan. Sé ba mandatu tinan lima rihun-300”, nia akresenta.
Maibé Ministru Fidelis hatutan, hafoin ukun hamutuk iha AMP hatuur programa ne’ebé hato’o ba populasaun durante kampaña hodi nune’e transforma sai programa governu.
“Saida mak akontese, durante debate OJE 2020 bankada CNRT maka vota abstensaun ba proposta orsamentu, ida-ne’ebé mak kontribui fallansu koletivu atu atinje kriasaun empregu rihun 60 kada tinan,” nia esplika.
Maske Ministru Fidelis esplika bebeik kona-ba promesa ne’e, no esplika ho lian maka’as, maibé faktu hatudu, governasaun atual ne’e governasaun daualu ho nia programa ida maka kriasaun kampu serbisu foun 60.00 kada tinan, la’os governasaun dasia ne’ebé tenke halakon tiha fali promesa ne’ebé promete tiha ona ba povu durante tempu kampaña politika.
