OELEO (TOP) – Prezidente Partidu Congreso Nacionál de Reconstrução de Timor (CNRT), Kay Rala Xanana Gusmão sei husu ba Prezidente Repúblika, José Ramos-Horta atu dekreta lalais loron ba eleisaun parlamentar iha tempu badak, no tenke tuir nafatin mandatu konstituisaun RDTL nian.
Xanana hatutan, partidu CNRT rasik iha foin lalais ne’e simu ona konvinte husi PR Ramos-Horta hodi marka ajenda atu rona partidu politiku sira nia pozisaun antes, xefe estadu anunsia kalendariu eleisaun parlamentar data votasaun.
“Iha loron 6 Fevereiru agora, ami sei hasoru prezidente repúblika, ami ba ha’u sei ko’alia ho prezidente katak, ami nia pozisaun, ami sei la fó dalan atu adia tan eleisaun, ami nian mak eleisaun tenki halo agora, atu nune’e, ema labele joga iha kotuk-kotuk,” dehan Xanana durante natál hamutuk no agradesimentu ba vitória eleisaun prezidensiál 2022 hamutuk ho militante partidu CNRT iha Suku Oeleu, Postu Bobonaro, Munisipiu Bobonaro.
Xanana dehan, tuir lei bainhira PR Horta rona tiha partidu asentu iha parlamentu no partidu sira ne’ebé la asentu inklui organizasaun naun govermental no sira seluk, prezidente iha kompetensia atu anunsia ka deside kalendariu eleisaun parlamentar no data eleisaun.
Tuir lei, hafoin prezidente repúblika rona tiha partidu politiku ne’ebé iha asentu parlamentar, determina, liu husi dekretu prezidenaial, data ba eleisaun deputadu sira ba Parlamentu Nasionál, ho antesedensia mínimu loron 80 (baze legál husi artigo no 17 da Lei No 9/2017).
