OELEO (TOP) – Prezidente Partidu Congreso Nacionál de Reconstrução de Timor (CNRT), Kay Rala Xanana Gusmão hateten, durante tinan lima ukun, nia la haree hetan Primeiru Ministru Taur Matan Ruak ne’ebé hetan viabiliza husi Partidu FRETILIN lideradu, Mari Alkatiri nunka halo programa dezenvolvimentu foun ruma ba nasaun no povu Timor-Leste.
Xanana observa, buat ne’ebé nia nota no haree hetan husi ukun partidu PLP, KHUNTO ne’ebé tonka husi FRETILIN so hatene de’it hasai ema ka funsionariu no direitor sira ne’ebé matenek to’o trabalador dasa-rai sira mós hasai hotu kedas hodi tau fali ema partidu nian ne’ebé la hatene halo serbisu no la domina sistema oinsa bele hadia sistema governasaun di’ak no halo dezenvolvimentu.
“La’os hanesan KHUNTO, tau nia feen ba Vise Primeira-Ministra la hatene halo serbisu, PLP dehan atu liberta povu, no fin fó (projetu) sesta bazika, maibé konta serbisu kona-ba sesta bazika la iha too ohin loron,” Xanana hateten assuntu ne’e bainhira hala’o konsolidasaun partidu CNRT nian iha suku Oeleo, munisipiu Bobonaro, Sabadu 21 Janeiru 2023.
Maske Xanana dehan, governasaun ida ne’e la halo buat ida, maibé governasaun PM Taur konsege jere fundu Covid-19 ho di’ak no transparante, no badinas halo projetu sesta bázika hodi hariku emprezariu sira husi PLP, FRETILIN no KHUNTO, susesu mós aprova osan hamutuk millaun $14 ba ro HAKSOLOK ne’ebé to’o oras ne’e seidauk to’o mai hela de’it, no susesu ida seluk mak konsege sobu tiha ponte Bekusi, no susesu seluk tan.
