DILI (TOP) – Prezidente Repúblika (PR), José Ramos-Horta maske seidauk dekreta loron ba eleisaun parlamentar iha tinan ida ne’e, maibé hahu husu ona ba lider partidu politiku sira hotu iha rai-laran atu evita hatun malu durante prosesu kampaña eleitoral hodi bele haburas de’it dame no paz iha rai-laran.
"Ejize konsensu ida di'ak para kampaña eleitoral mai ne'e tenki foka ba programa ba futuru, labele hanesan ra'ut malu pesoal, nu'udar Xefe Estadu sei interven hahalok sira hanesan ne'e bainhira mosu iha kampaña politika," PR Horta hato’o kestaun ne’e ba jornalista sira hafoin fila husi Brazil iha loron Sesta 06 Janeiru 2023 iha aeroportu internasional Prezidente Nicolau Lobato, Komoro-Dili.
"Ha'u espera mak ida ne'e, iha eleisaun 2023 ne'e partidu sira tenki aprezenta programa politiku ba tinan lima nian, para estabilizasaun demokratika, estabilizasaun politika konsolidasaun tenki iha ajenda, maibé tenki programa ida-di'ak kona-ba rekuperasaun ekonomika," xefe estadu afirma.
Tanba tuir xefe estadu, tinan 2023 situasaun mundial sei bele pior, hanesan ema hotu akompaña no haree tiha ona ba kotuk iha tinan 2021 no 2022 problema boot iha ekonomia mundial.
"Tanba ekonomia mundial daudaun ne'e monu no la iha sinal ruma kona-ba rekuperasaun ekonomia to'o halo folin sasan sa'e ba beibe'ik."
"Dezempregu iha mundu aumenta liu-liu iha Amerika Latina, Afrika, Azia no Europa. Portantu, lider sira tenki kuidadu ho ida ne'e, buka hodi halo politika ida ne'ebe bele dinamiza ita ninia ekonomia iha kontestu krizi mundial ne'ebe halo ekonomia mundial iha situasaun difisil tebes-tebes," xefe estadu fundamenta.
Xefe estadu reforsa hodi nafatin fó hanoin ba lider politiku sira hato'o de'it mak programa konkretu bainhira ka'er ukun bele implementa hodi hadi'a povu nia moris.
"La'os ko'alia kona-ba istoria se mak luta se mak la luta, nune'e dala ida tan hanesan xefe estadu kuandu rona sei la tolera no sei interven hodi bolu CNE ko'alia publikamente (hodi fó sansaun), tanba povu mós kolen ona haree no rona lider sira iha kampaña halo atake ba malu de'it hodi la foku ba hato'o programa," PR Horta hakotu.
