DILI (TOP) – Ema hamutuk nain 500 ne’ebé oras ne’e balun ativu hela serbisu iha administrasaun públiku simu posse ona hodi assume kargu balun iha Klibur Profisional partidu CNRT nian atu prepara ba hasoru eleisaun parlamentar iha tinan 2023.
Husi ema nain 500 ne’e fahe ba departamentu 17 iha partidu Congresso Nacional de Reconstrução de Timor (CNRT) nian ne’ebé mai husi área oioin hanesan edukasaun, desportu, finansas, administrasaun estatal, apoiu parlamentar no área seluk tan.
Ema hirak ne’e maioria funsionariu públiku, no balun tenke hetan ezonerasaun bainhira partidu FRETILIN tama viabiliza governasaun atual, no balun tenke hasai husi serbisu administrasaun públiku hodi tau fali milintante partidu FRETILIN, no Partidu Libertasaun Popular (PLP), no KHUNTO.
Klibur Profisional nain 500 simu posse iha sede nasional CNRT, Sabadu 03 Dezembru 2022. Credit: Julio Goncalves.
Durante seremonia posse ne’ebé hala’o iha sede nasionál partidu CNRT iha Bairo Grilhos, ema hirak ne’e mai ho kompromisiu ida katak, firme no prontu ona hodi mobiliza masa iha teritoriu nasionál hodi lori vitoria ba CNRT atu ukun iha tinan lima oin mai tan.
Hafoin seremonia posse, Sekretariu Jeral Partidu CNRT, Francisco Kalbuadi Lay husu ba ema hirak ne’e atu kontinua hala’o serbisu iha ekipa hodi bele lori vitoria ba partidu ne’e iha eleisaun parlamentar tinan oin, no husu mós ba sira ne’ebé hetan ezonerasaun husi kargu xefia sira atu kontinua hala’o serbisu hanesan baibain, tanba sura fulan de’it ona mandatu governu ne’e atu hotu ona.
“Sira hasai imi, ita sei hatama fali sa, ne’ebé kalma de’it falta fulan hirak oan ne’e? Husu bai ta boot sira tenke serbisu iha ekipa no ba bolu tan maluk sira seluk hodi mai hamutuk iha CNRT hodi lori vitoria ba iha eleisaun parlamentar,” hateten Sekretariu Jeral Partidu CNRT, Dato Sri Francisco Kalbuadi Lay durante nia orientasaun politika ba klibur profisional nain 500 iha sede nasionál partidu CNRT iha Bairo Grilhos, Dili Sabadu 03 Dezembru 2022.
Klibur Profisional nain 500 simu posse iha sede nasional CNRT, Sabadu 03 Dezembru 2022. Credit: Julio Goncalves.
Eis Prezidente Federasaun Futebol Timor-Leste (FFTL) ne’e kontinua husu ba klibur profisional sira atu serbisu hamutuk ho departamentu sira seluk iha partidu laran hodi sai metin liutan, no husu mós ba sira atu prepara aan didi’ak hodi prontu ba ukun no servi povu iha tinan 2023 ba oin.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
