LOLOTOE (TOP) – Parlamentu Nasionál (PN) oras ne’e planeia ona osan lubuk ida hodi sosa tan kareta foun ba deputadu no deputada sira iha uma-fukun PN, maibé parte CNRT nian sei vota kontra planu ne’e, tanba konsidera ne’e atu gasta de’it povu nia osan.
Antes ne’e iha tinan 2019, PN sosa tiha ona kareta Pajero Sport (Mitsubishi) hamutuk 35, no falta kareta 30 tan atu kompleta ba kareta 65.
Nune’e, maske deputadu sira atual sira nia mandatu sura de’it loron atu remata ona, maibé Sekretariu Jeral PN, Adelino Afonso de Jesus hateten, PN sei sosa tan kareta foun hamutuk 30 atu kompleta ba kareta 65 ba deputadu sira iha tinan 2023.
Osan privativu fofoun ba PN ne’e hamutuk millaun US$ 16,210,224,00, maibé tanba de’it atu sosa tan kareta foun hamutuk 30 ba deputadu sira, ikus mai osan ne’e hasa’e ba millaun US$ 17,975,000.
Bankada FRETILIN sei hetan 12, bankada CNRT sei hetan kareta 9, bankada PLP sei hetan kareta 5, bankada KHUNTO sei hetan kareta 3, bankada PD sei hetan kareta 3, PUDD sei hetan kareta ida, UDT sei hetan kareta ida no ikus liu mak Frente-Mudansa sei hetan kareta ida.
Maibé, deputadu joven José Virgílio R. Ferreira husi bankada CNRT hateten, CNRT sei vota kontra total planu sosa kareta foun ne’e, tanba tuir nia katak, loloos osan sira ne’e tenke aloka ba hadia povu nia kondisaun moris hanesan aumenta ba sosa fasilidade saúde, edukasaun no área sira seluk ne’ebé fó benefisiu ba povu tomak, la’os ba grupu ki’ik balun de’it.
“Ami sei vota kontra sosa kareta foun ne’e, tanba ne’e gasta osan arbiru de’it, no tuir loloos osan sira ne’e lori ba hadia povu nia moris,” deputadu Agio hateten bainhira partisipa iha seremonia agradesimentu no konsolidasaun partidu CNRT nian iha postu administrativu Lolotoe, munisipiu Bobonaro, Domingu 9 Outubru 2022.
Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira, simu ona Proposta Lei Orsamentu Jerál Estadu (OJE) 2023 nian ne’ebé entrega direta husi Ministru Finansas, Rui Augusto Gomes, iha loron 3 fulan outubro tinan 2022, iha sala Konferensia.
Proposta Lei OJE 2023 ne’ebe aprezenta husi Governu liu husi Ministru Finansas ne’e ho montante billiaun $ 3,16.
